اوکاڑہ،یکم جولائی (اے پی پی ):ڈپٹی کمشنر زاہد پرویز وڑائچ نے کہا ہے کہ ریونیو عوامی خدمت کچہری کا تواتر سے انعقاد لوگوں کے محکمہ مال سے متعلقہ مسائل کو مقامی سطح پر فوری حل کرنے کی ایک موثر اور جامع حکمت عملی ہے، ریڈ ٹیپ ازم کے خاتمہ کی انتظامی کاوش کے فوائد ، شہریوں کے مسائل کے حل کی جانب ایک مثبت قدم ہے، ہمیں لوگوں کے مسائل اور مشکلات کے حل کے لئے جس حد تک بھی جانا پڑا ہم جائیں گے اور لوگوں کے ریلیف کے لئے کوئی دقیقہ فروگذاشت نہیں کیا جائے گا ۔
ان خیالات کا اظہار انہوں نے ضلع کونسل میں ریونیو عوامی خدمت کچہری میں سائلین کی درخواستوں پر احکامات جاری کرتے ہوئے کیا۔ کھلی کچہری میں اسسٹنٹ کمشنرملک راشد نعمت کھوکھر سمیت متعلقہ افسران اور محکمہ مال کا فیلڈ عملہ بھی موجود تھا ۔
ڈپٹی کمشنر زاہد پرویز وڑائچ نے کہا کہ ریونیو عوامی خدمت کچہری جہاں لوگوں کے محکمہ مال سے متعلقہ مسائل کے فوری حل کی ایک کاوش ہے وہیں پر عام لوگوں کو سرکاری دفاتر سے متعلقہ مسائل و مشکلات کے حل کے لئے ایک موثر پلیٹ فارم ہے، ریونیو کھلی کچہری میں آنے والے سائلین کی درخواستوں پر فوری ایکشن کے لئے متعلقہ اداروں کو ہدایات جاری کی جاتی ہیں اور اس سلسلہ میں ان سے رپورٹ بھی طلب کی جاتی ہے تاکہ لوگوں کے مسائل اور مشکلات مستقل بنیادوں پر حل ہو سکیں۔ انہوں نے کہا کہ سرکاری ادارے عوام کو ریلیف فراہم کرنے کے لئے تما م وسائل بروئے کار لائیں، افسران اوپن ڈور پالیسی پر عمل در آمد کرتے ہوئے اپنے دفاتر سے متعلقہ لوگوں کے مسائل ترجیحی بنیادوں پر حل کریں ۔
