نارووال،21 جولائی ( اے پی پی:( ڈپٹی کمشنر امتیازشاہدگوندل کی زیر صدارت محرم الحرام کے حوالے سے ڈسٹرکٹ بین المذاہب ہم آہنگی اورڈسٹرکٹ امن کمیٹی کے علیحدہ علیحدہ اجلاس منعقد کئے گئے،اجلاس میں ایڈیشنل ڈپٹی کمشنر(جنرل)محمدحنیف کے علاوہ علامہ قاضی محمدیعقوب رضوی،حافظ ذوالفقارمہیس،حافظ عبدالمجید،پیرمحمدتبسم بشیراویسی،شیخ ثائرعلی،علامہ سرورسلہریا،علامہ عطاالمصطفی رضوی،ڈاکٹرطارق اپل،حاجی الیاس بٹ،ثمرناظر،عبدالغفارریحان کے علاوہ قانون نافذکرنے والےاداروں کےافسران نے شرکت کی۔
ڈپٹی کمشنرامتیازشاہدگوندل نے ممبران امن کمیٹی کے شرکاء سے خطاب کرتے ہوئے کہاکہ امن وامان کاقیام حکومت وقت کی اولین ترجیح ہے،امن وامان کے بغیرکامیاب ریاست کاوجود ممکن ہی نہیں،اس حوالے سے علمائے کرام کا کردار قابل تحسین ہے جسے کسی صورت فراموش نہیں کیاجاسکتا۔علمائےکی طرف سے منبرومحراب کے ذریعے دیگرمسائل کے ساتھ ساتھ بالخصوص پیار محبت ویگانت اور امن وامان کے پیغام کوعام کرنا وقت کی اہم ضرورت ہے۔
ڈپٹی کمشنرنارووال نے کہاکہ محرم الحرام اسلامی تاریخ کاایک مقدس مہینہ ہے جوکہ ہمیں پیارمحبت،رواداری اور یگانت کادرس دیتاہے اور اس کا عملی نمونہ شہدائے کربلا کی قربانیوں سے ملتا ہے لہذاہمیں اپنے اسلاف کی تعلیمات اوران کے نقش قدم پرچلنا ہوگا اسی میں ہم سب کی کامیابی ہے۔
امتیازشاہدگوندل نے کہا کہ شرانگیزی فتنہ فساد برپاکرنے والے محب وطن نہیں بلکہ یہ ملک وقوم کے دشمن ہیں جو کسی صورت امن وامان کے وجود کوبرداشت نہیں کرسکتے لہذاایسے افراد پرکڑی نظررکھناہوگئی اوراس حوالے سے قانون نافذکرنے والے ادارے ایسے افراد پرپوری نظررکھے ہوئے ہیں۔
اجلاس میں ممبران علامہ پیرقاضی محمد یعقوب رضوی،حافظ ذوالفقارمہیس،حافظ عبدالمجیدبٹ،علامہ پیرمحمد تبسم بشیراویسی،ڈاکٹرمحمدطارق اپل ودیگرنے اس موقع پر ڈپٹی کمشنرنارووال امتیاز شاھد گوندل کو اس بات کی یقین دہائی کروائی کہ ہم ضلع نارووال کے باسی ہیں اس کاامن ہمیں عزیز ہے اور امن عامہ کو قائم رکھنے کی بابت ہم انتظامیہ کے ساتھ ہر قسم کا تعاون کرنے کے لئے ہمہ وقت تیار ہیں۔انہوں نے کہا کہ یہاں پر تمام مکاتب فکرکے علمائے کرام ایک پلیٹ فارم پر ہیں ہماری خوشیاں اور غمیاں سانجھی ہیں ۔انہوں نے یقین دلایاکہ نارووال ایک پرامن ضلع تھا ہے اور رہے گا انشاءاللہ اور امن کے لحاظ سے اس کا شمار پنجاب کے بہترین اضلاع میں ہوتاہے۔انہوں نے یقین دلایاکہ اس کے باوجودڈسٹرکٹ امن کمیٹی اوربین المذاہب کمیٹی امن وامان کے حوالے سے حکومت کی طرف سے مرتب کردہ ضابطہ اخلاق کی پاسداری کوہرصورت یقینی بنایا جائے گا۔
ڈپٹی کمشنرامتیاز شاہدگوندل نے اجلاس کے اختتام پر شرکاء اجلاس کاشکریہ اداکرتے ہوئے کہا کہ ضلع بھر میں ایام عاشوراور محرالحرام کو پرامن طریقے سے منانے کےلئے ہر ممکن حفاظتی اقدامات کئے جا رہے ہیں،پولیس اور دیگر قانون نافذ کرنے والے اداروں کی طر ف سے اس ضمن میں مکمل طور پر فوک پروف سیکورٹی پلان پر عمل درآمد کو یقینی بنائیں گے، مجالس اور جلوسوں کی نگرانی سی سی ٹی وی کیمروں سے کی جائیگی جوضلعی کنٹرول روم سے منسلک ہونگے اور کنٹرول رومز کے ذریعے جلوسوں کی ہر زاویے سے مانیٹرنگ کو یقینی بنایا جائیگا۔
