اسلام آباد،21اگست (اے پی پی):وفاقی وزیر داخلہ رانا ثنا اللہ نے کہا ہے کہ افغانستان ہمارا برادر اسلامی ملک ہے، ہمارے اس کے ساتھ دیرینہ تعلقات ہیں۔ وفاقی وزیر داخلہ رانا ثنا اللہ نے افغانستان سے متعلق اپنے بیان کی وضاحت کرتے ہوئے ویڈیو بیان جاری کیا ہے ۔
وزیر داخلہ نے کہا کہ آج میری پریس کانفرنس میں میرا جملہ یہ تھا کہ عمران خان نے افغانستان میں ڈرون حملے سے متعلق ریاست پاکستان پر جو الزامات عائد کئے ہیں، ایسے الزامات کسی دشمن ملک اور افغانستان نے بھی نہیں لگائے۔ رانا ثنا اللہ نے وضاحت کی کہ اس میں لفظ ”اور”کسی وجہ سے کٹ گیا ہے۔ وفاقی وزیر داخلہ نے کہا کہ میں یہ وضاحت کرنا چاہتا ہوں کہ افغانستان ہمارا برادر اسلامی ملک ہے، ہمارے اس کے ساتھ دیرینہ تعلقات ہیں۔
