بہاولنگر،22 اگست (اے پی پی):ضلع بھر میں 5 روزہ پولیو مہم کا آغاز ہوگیا ہے ، ڈسٹرکٹ ہیڈ کوارٹر ہسپتال میں پولیو مہم کی افتتاحی تقریب منعقد کی گئی۔ اے ڈی س جی عبدالجبار گجر نے سی ای او ہیلتھ ڈاکٹر سلیم اکبر لغاری کے ہمراہ بچوں کو پولیو کے قطرے پلا کر مہم کا افتتاح کیا، پولیو تقریب میں ڈبلیو ایچ او کےنمائندے نے خصوصی شرکت کی۔
اس موقع پر سی ای او ہیلتھ ڈاکٹر سلیم اکبر لغاری نے بریفنگ دیتے ہوئے بتایا کہ مہم کےدوران 5 لاکھ 79 ہزار سے زائد بچوں کو پولیو ویکسین پلانے کا ٹارگٹ مقرر کیا گیا ہے، پولیو مہم 22 تا 26 اگست جاری رہے گی، پولیو مہم میں 2562 موبائل، 136 فکسڈ اور 88 ٹرانزٹ ٹیمیں حصہ لے رہی ہیں ، بچوں کو پولیو ویکسین پلاتے وقت پولیو ورکرز کورونا ایس او پیز پر مکمل عملدرآمد کریں گے ،پولیو ورکرز کی سیکیورٹی کے لئے مناسب انتظامات کئے گئے ہیں۔
اے ڈی سی جی عبدالجبار گجر نے کہا کہ شہریوں سے اپیل ہے کہ اپنے بچوں کے محفوظ مستقبل کےلئے انہیں پولیو قطرے لازمی پلوائیں۔
