ملتان 19 ستمبر (اے پی پی ):ڈی آئی جی زون شاہد جاوید نے موٹروے پر چلنے والی تمام بس کمپنیز کو ہدایات جاری کر دی سیکٹر کمانڈر رانا محمد اسماعیل کی سربراہی میں سیکٹر آفس میں بس کمپنیز کے مالکان سے میٹنگ کی گئی ۔
زونل کمانڈر/ڈی آئی جی موٹروے سنٹرل II زون شاہد جاوید کی ہدایت پر سیکٹر کمانڈر رانا محمد اسماعیل کی سربراہی میں سیکٹر آفس میں میٹنگ کا انعقاد کیا گیا جس میں تمام بس کمپنیز کے مالکان موٹروے پولیس کے افسران و ملازمان نے شرکت کی۔ میٹنگ میں سیکٹر کمانڈر رانا محمد اسماعیل نے انسپکٹر جنرل نیشنل ہائی ویز اینڈ موٹرویز پولیس خالد محمود کے احکامات بس کمپنیز کے مالکان تک پہنچائے. MC-II زون پر بغیر ایمرجنسی ایگزٹ اور بغیر ٹریکر والی بسوں کے خلاف کریک ڈاؤن جاری رکھتے ہوئے سیکٹر کمانڈر نے کہا کہ بغیر ٹریکر اور ایمرجنسی ایگزٹ والی پبلک ٹرانسپورٹ کا داخلہ موٹروے پر بند کر دیا گیا ہے۔ تمام بس کمپنیز، بس ڈرائیورز کے حوالے کرنے سے پہلے ڈرائیورز کے اوقات اور آرام کو مانیٹر کریں۔ کنڈکٹرز/ اسٹیورڈز کو بھی بسوں میں سونے کی اجازت نہیں ہونی چاہیے، بلکہ انہیں ڈرائیور کی ڈرائیونگ پر نظر رکھنے کا ذمہ دار بنایا جانا چاہیے۔ ڈرائیورز کی پچھلی سیٹوں پر بیٹھے مسافروں کو بتایا جائے اگر ڈرائیور نیند کی حالت میں گاڑی چلاتے ہیں یا حد رفتار سے تجاوز کرتے ہیں تو NHMP کے ہیلپ لائن نمبر پر اطلاع دیں۔ سیکٹر کمانڈر نے مزید کہا کہ اگر ڈرائیوروں کی لاپرواہی بالخصوص نیند آنے کی وجہ سے حادثہ پیش آیا تو کمپنی کے خلاف سخت کارروائی کی جائے گی اور موٹروے پر اس کمپنی کا داخلہ بند کر دیا جائے گا۔ بسوں میں ٹریکر اور ڈیش بورڈ کیمرہ لگانے اور انہیں مانیٹر کرنے کا مقصد ڈرائیورز کو قانون کی پاسداری کروانا ہے تا کہ بس میں موجود مسافروں کی جان و مال کی حفاظت کو یقینی بنایا جا سکے۔ میٹنگ میں انسپکٹر ممتاز بھٹی، سب انسپکٹر انتظار مہدی، سب انسپکٹر غلام مصطفیٰ اور دیگر آفیسران نے بھی شرکت کی۔
