اسلام آباد،24نومبر (اے پی پی):صدر مملکت ڈاکٹر عارف علوی نے کہا ہے کہ پاکستان کے پاس بہت سے وسائل اور مواقع ہیں ، اپنے ملک کو مضبوط اور خوشحال بنانے کے لئے ہماری آنے والی نسلوں کو بنیاد اور محرک فراہم کرنے کیلئے ان مواقع سے آگاہ کرنا چاہئے، سیاسی استحکام کا معاشی استحکام سے گہرا تعلق ہے، اپنی ذاتی حیثیت میں متعلقہ سٹیک ہولڈرز کو ایک میز پر لانے کی کوشش کر رہا ہوں تاکہ قوم کو درپیش اہم مسائل کے حل کے لئے اتفاق رائے پیدا کیا جا سکے۔
ان خیالات کا اظہار انہوں نے لندن سکول آف اکنامکس سٹوڈنٹس یونین پاکستان ڈویلپمنٹ سوسائٹی کے زیر اہتمام ایوان صدر کے کردار کے موضوع پر منعقدہ سیمینار سے ورچوئل خطاب کرتے ہوئے کیا۔ اس سیشن کی صدارت لندن سکول آف اکنامکس اینڈ پولیٹیکل سائنس (ایل ایس ای ) کی ڈائریکٹر بیرونس منوشے شفیق نے کی۔
صدر مملکت نے کہا کہ آئین میں ایوان صدر کا کردار ایک متحد قوت کے طور پر موجود ہے جہاں صدر ،مملکت کا سربراہ ہوتا ہے اور منتخب وزیر اعظم کو ایگزیکٹو اختیارات حاصل ہوتے ہیں۔ انہوں نے کہا کہ وہ آئین کے دائرے میں رہ کر اپنا کردار ادا کر رہے ہیں۔انہوں نے کہا کہ اس حقیقت کے باوجود کہ پاکستان کو مشکلات اور چیلنجز کا سامنا تھا تاہم اس کے پاس بہت سے وسائل تھے جن کی وجہ سے اسے بہت سے بحرانوں پر کامیابی سے قابو پانے میں مدد ملی۔انہوں نے کہا کہ کورونا کے دوران پاکستان نے کوویڈ۔19 وبائی امراض کا مقابلہ کرنے کے لئے ایک منفرد اور اپنی مرضی کے مطابق تیار کردہ حکمت عملی کا استعمال کیا۔ قیادت، متعلقہ اداروں اور صحت کے حکام نے یکسانیت کے ساتھ کام کیا، جزوی طور پر لاک ڈاؤن کی حکمت عملی کو اپنایا اور اس پر کمیونیکیشن ، آگاہی اور تعلیمی ذرائع کے استعمال سے عملدرآمد یقینی بنایا، اس سے ملک کو لوگوں کی زندگیاں اور روزگار بچانے میں مدد ملی، ہماری مساجد، کاروبار اور صنعتی مقامات کو کھلے رہے اور ہم اس بحران سے اپنے پڑوسیوں اور دنیا کے بہت سے دوسرے ممالک سے بہتر طور پر نکل آئے۔
صدر مملکت نے کہا کہ پاکستان برابری، وقار اور خودمختاری کی بنیاد پر پوری دنیا میں امن کی وکالت کرتا ہے اور بین الاقوامی اور علاقائی تنازعات کا مذاکرات، بات چیت اور غور و خوض کے ذریعے حل چاہتا ہے۔ انہوں نے اس بات پر زور دیا کہ عالمی برادری اور اقوام متحدہ کو چاہئے کہ وہ اقوام متحدہ کی سلامتی کونسل کی قراردادوں کے مطابق بھارت کے غیر قانونی طور پر مقبوضہ جموں و کشمیر کے دیرینہ تصفیہ طلب مسئلہ کو حل کرنے اور بھارت میں بڑھتی ہوئی مذہبی انتہا پسندی، اس کے ہندوتوا نظریے ،اسلامو فوبیا اور اقلیتوں بالخصوص مسلمانوں پر ظلم و ستم کی روک تھام کے لئے اپنا کردار ادا کریں ۔
صدر مملکت ڈاکٹر عارف علوی نے کہا کہ پاکستان نے کم وسائل کے باوجود گلوبل وارمنگ اور موسمیاتی تبدیلیوں کا مقابلہ کرنے کا چیلنج قبول کیا اور ایک ارب درخت لگانے کا پروگرام شروع کیا اور بعد میں اس کی کامیابی پر حکومت نے 10 بلین درختوں کا آغاز کیا۔ گرین ہاؤس گیسوں کے اخراج کو کم کرنے، موسمیاتی تبدیلی کے اثرات کو کم کرنے اور آنے والی نسلوں کے لئے نباتات اور حیوانات اور فطرت کو بچانے کے لئے شجرکاری مہم جو کہ کل کی بہتر دنیا کے لئے ہمارا حصہ ہے۔انہوں نے کہا کہ پاکستان نے بین الاقوامی نوعیت کے بحران کے باعث بے گھر ہونے والے مہاجرین کے لئے فراخدلی سے اپنا ہاتھ کھول دیا اور 40 سال سے زائد عرصے سے لاکھوں افغان مہاجرین کی میزبانی کر رہا ہے جس کی عالمی تاریخ میں مثال نہیں ملتی۔ انہوں نے کہا کہ تمام پناہ گزینوں کے ساتھ یکساں سلوک کیا جانا چاہئے اور ان کے ساتھ بلا تفریق نسل، رنگ یا مذہب ایک جیسا سلوک کیا جانا چاہئے۔انہوں نے کہا کہ ایوان صدر نے قوم کو درپیش سماجی اور صحت کے مسائل سے نمٹنے اور مہنگے اور نایاب علاج سے بچنے کے لئے خود معائنہ اور جلد تشخیص پر توجہ مرکوز کرتے ہوئے علاج کے احتیاطی طریقوں کو فروغ دینے میں بڑھ چڑھ کر حصہ لیا۔
صدر مملکت نے کہا کہ پاکستان کو چھاتی کے کینسر کے پھیلاؤ کا سامنا عالمی اوسط سے کہیں زیادہ ہے جس کی وجہ سےاس سے منسلک سماجی اور ثقافتی ممنوعات اور تعلیم اور آگاہی کی کمی ہے،یہ صورتحال اب خاتون اول کی قیادت میں گزشتہ چار سالوں میں مسلسل آگاہی اور تعلیم کیلئے کوششوں کے آغاز سے تبدیل ہو رہی ہے جس میں ہر قسم کے کمیونیکیشن ذرائع بشمول سوشل اور روایتی میڈیا اور سیل فون کا استعمال کرتے ہوئے خود جانچ اور جلد تشخیص پر زور دیا گیا ہے ۔ انہوں نے کہا کہ اب زیادہ سے زیادہ خواتین چھاتی کے کینسر کے ابتدائی مراحل میں طبی امداد حاصل کر رہی ہیں جن کی صحت یابی کی شرح 90 فیصد سے زیادہ ہے۔
دماغی صحت کے معاملے پر بات کرتے ہوئے انہوں نے کہا کہ پاکستان میں اس موضوع کو اب بھی ممنوع سمجھا جاتا ہے، اس حقیقت کے باوجود کہ 24 فیصد پاکستانی کسی نہ کسی قسم کے ذہنی دباؤ کا شکار ہیں۔ انہوں نے کہا کہ پاکستان میں تقریباً 220 ملین کی آبادی کے لئے 2000 سے کم ذہنی صحت کے پیشہ ور افراد ہیں جو کہ انتہائی ناکافی ہیں اور انہوں نے ٹیکنالوجی اور ویب پر مبنی آئی ٹی ٹولز کو استعمال کرنے کی ضرورت پر زور دیا تاکہ ایک بڑی آبادی تک ذہنی صحت کی سہولیات تک رسائی میں خاطر خواہ اضافہ کیا جا سکے۔انہوں نے کہا کہ ایوان صدر نے نوجوانوں کی مہارتوں کے فروغ خاص طور پر آئی ٹی کے شعبے میں تعلیم کے لئے پروگرام کی سربراہی کی کیونکہ وہ سمجھتے ہیں کہ یہ پاکستان کی ترقی کا تیز ترین راستہ ہے۔انہوں نے کہا کہ پاکستان میں نوجوان نسل ایک بہت بڑا اثاثہ ہے جسے انفارمیشن ٹیکنالوجی، کمپیوٹنگ، مصنوعی ذہانت، ورچوئل رئیلٹی اور بلاک چین ٹیکنالوجیز اور اس طرح کے دیگر جدید شعبوں میں معیاری تعلیم اور ہنر فراہم کر کے معاشی قوت میں تبدیل کیا جا سکتا ہے جس سے ملک اور دنیا کے دیگر ممالک کی مسلسل بڑھتی ہوئی ضروریات کو پورا کرنے میں مدد ملے گی۔
صدر مملکت ڈاکٹر عارف علوی نے کہا کہ وزیراعظم کے آن لائن ڈیجیٹل اسکلز پروگرام سے 2.4 ملین افراد مستفید ہوئے ہیں جو ان شعبوں میں نوجوانوں کی دلچسپی کو ظاہر کرتا ہے۔ انہوں نے پاکستانی تارکین وطن پر زور دیا کہ وہ ملک میں آئی ٹی پر مبنی کاروباری ماحولیاتی نظام کی تشکیل میں مدد کریں۔انہوں نے کہا کہ وہ سرکاری اور نجی دونوں شعبوں میں تمام اسٹیک ہولڈرز کو فعال طور پر شامل کر رہے ہیں تاکہ خواتین کی 50 فیصد سے زائد آبادی کو فعال اقتصادی دھارے میں شامل کیا جا سکے اور اسٹیک ہولڈرز کی حوصلہ افزائی کر کے ان کے لئے ان کی مکمل صلاحیتوں کا ادراک کرنے کے لئے سازگار ماحول پیدا کیا جا سکے۔انہوں نے کہا کہ وہ جعلی خبروں کے معاملے پر توجہ دے رہے ہیں جو نچلی سطح پر سوشل میڈیا کے پھیلاؤ کی وجہ سے بڑھ گیا تھا۔ انہوں نے کہا کہ ہمیں اپنے عوام کو صرف ایسی خبروں کی تفریح اور تربیت دینے کی ضرورت ہے جو کسی مستند ذریعہ سے لی گئی ہوں اور اسے مزید پھیلانے سے پہلے قابل اعتماد ذرائع سے تصدیق کی گئی ہو۔
صدر مملکت ڈاکٹر عارف علوی نے کہا کہ جعلی خبروں سے مستند خبروں کی تلاش کے حوالہ سے تعلیم، تربیت اور آگاہی ہی جعلی خبروں کے انسداد کا بہترین حل ہے۔ملک کی سیاسی اور معاشی صورتحال پر روشنی ڈالتے ہوئے انہوں نے کہا کہ وہ سمجھتے ہیں کہ سیاسی استحکام کا معاشی استحکام سے گہرا تعلق ہے، اس لئے وہ اپنی ذاتی حیثیت میں متعلقہ اسٹیک ہولڈرز کو ایک میز پر لانے کی کوشش کر رہے ہیں تاکہ قوم کو درپیش اہم مسائل کے حل کے لئے اتفاق رائے پیدا کیا جا سکے۔
