لاہور،01دسمبر (اے پی پی):وفاقی وزیر منصوبہ بندی پروفیسر احسن اقبال نے کہا ہے کہ تعمیری معاشرے کیلئے تعلیم ناگزیر ہے،یونیورسٹیاں دور حاضر کو دیکھتے ہوئے نصابی سرگرمیوں کو فروغ دیں، دنیا میں آگے بڑھنے کے لیے تکنیکی تعلیم ضروری ہے۔ان خیالات کا اظہار انہوں نے جمعرات کے روزیہاں یونیورسٹی آف منیجمنٹ اینڈ ٹیکنالوجی (یو ایم ٹی) میں منعقدہ”سول اینڈ کنسٹرکشن انجینئرنگ میں جدت ” کے موضوع پر بین الاقوامی کانفرنس سے خطاب کرتے ہوئے کیا۔اس موقع پر صدر یو ایم ٹی ابراہیم حسن مراد،ریکٹر یو ایم ٹی ڈاکٹر آصف رضا، ڈی جی یو ایم ٹی پروفیسر عابد شیروانی، پروفیسر ڈاکٹر مجاہد کامران،ڈین سکول آف انجینئرنگ ڈاکٹر عثمان رشید سمیت دیگر فیکلٹی،قومی و بین الاقوامی سکالرز، ریسرچرز،سول انجینئرز ، طلبا نے شرکت کی اور سول انجینئرنگ کے حوالے سے50 سے زائد تحقیقی مقالہ جات بھی پیش کئے۔
وفاقی وزیر احسن اقبال نے کہا کہ سی پیک پاکستان کے لیے ایک گیم چینجر منصوبہ ہے،گزشتہ سالوں میں بین الاقوامی سطح پر کنسٹرکشن انڈسٹری میں ٹیکنالوجی اور انوویشن نے بہت گہرا اثر چھوڑا اور تبدیلیاں لائی ہیں،سیاسی عدم استحکام ہمار ے ہاں ایک مسئلہ ہے اور پالیسیوں کا تسلسل نہیں رہا۔
وفاقی وزیر نے کہا کہ معاشی ماہرین، تاجر وں اور صنعت کاروں کوجدید ٹیکنالوجی کی طرف آ نا چاہیے کیونکہ جدید ٹیکنالوجی کے استعمال کے بغیر ملکی ترقی ممکن نہیں،جتنی زیادہ ملک میں بیرونی سرمایہ کاری آ ئے گی معیشت اتنی زیادہ ترقی کرے گی، ڈالر آئیں گے تو ملک چلے گا۔انہوں نے مزید کہا کہ ہمیں نوجوان نسل کو اچھا مستقبل دینے کی طرف جانا ہو گا اور کہا کہ یونیورسٹیز میں ریسرچ سسٹم بہت اچھا اور عام ہونا چاہئیے کیونکہ ریسرچ سے ہی ہماری برآمدات میں اضافہ ہو گا اور ملک ترقی کرے گا۔
ریکٹر یو ایم ٹی ڈاکٹر آصف رضا نے سول انجینئرنگ ڈپارٹمنٹ کو کامیاب کانفرنس کے انعقاد پر مبارکباد پیش کی اور تقریب سے خطاب کرتے ہوئے کہا کہ انجینئرنگ کا شعبہ ملکی ترقی میں انجن کی سی حیثیت رکھتا ہے،ملک میں بہت قابل انجینئرز ہیں،ہمیں ان کے تجربہ سے استفادہ کرنا چاہیئے ۔ ان کا مزید کہنا تھا کہ پاکستان انجینئرنگ کونسل اپنا اہم کردار ادا کرتے ہوئے تعلیمی اداروں کے ساتھ مل کر انجینئرنگ ایجوکیشن کو بہتر کر رہی ہے،بہت جلد ہم شعبہ انجینئرنگ میں آگے نکل جائینگے،گنجان آبادی کا مسئلہ انجینئرنگ میں ریسرچ اور جدت سے ہی دور ہو سکتا ہے۔
تقریب کے اختتام پر صدر یو ایم ٹی ابراہیم مراد نے وفاقی وزیر پروفیسر احسن اقبال کو ریکٹر یو ایم ٹی کے ہمراہ سوینئر بھی پیش کیا۔
