لاہور،12دسمبر (اے پی پی):وفاقی وزیر ہوا بازی خواجہ سعد رفیق نے پاکستان انٹرنیشنل ایئر لائن (پی آئی اے) کو ہدایت کی ہے کہ سیاحت کے فروغ کے لئے سکردو، گلگت،چترال اور ہنزہ کے لئے ڈسکاؤنٹ پیکیج بنائے جائیں، موسم سرما میں کراچی اور لاہور سے سکردو کی پروازیں دوبارہ شیڈول کا حصہ بنائی جائیں۔
یہ ہدایات انہوں نے پیر کو اپنی زیر صدارت پی آئی اے کے اعلیٰ سطحی اجلاس کے دوران جاری کیں -اجلاس میں پی آئی اے کے چیف ایگزیکٹو آفیسر ،چیف کمرشل آفیسر، چیف ہیومن ریسورس آفیسر، چیف فنانشل آفیسر نے شرکت کی۔
وفاقی وزیر نے سیاحت کے فروغ کے لیے اسکردو، گلگت،چترال اور ہنزہ کی لیے ڈسکاؤنٹ پیکیج بنانے کی ہدایت کی اور کہا کہ مجموعی طور پر پروازوں کے شیڈول میں بہتری لائی جائے۔ انہوں نے موسم سرما میں کراچی اور لاہور سے سکردو کی پروازیں دوبارہ شیڈول کا حصہ بنانے کی بھی ہدایت کی ۔ انہوں نے ہدایت کی کہ چھوٹے کمرشل جیٹ جہازوں کےآپریٹرز کے ساتھ مشترکہ منصوبہ بندی کا جائزہ لیا جائے۔
اجلاس کے دوران آگاہ کیا گیا کہ بہترین معیار کے حامل تین وائڈ باڈی جہاز بہت جلد پی آئی اے فضائی بیڑے کا حصہ بننے جا رہے ہیں،پاک بحریہ کو دیئے جانے والے اے ٹی آر جہاز کے معاملات کا بھی جائزہ لیا گیا۔ وفاقی وزیر نے فلائٹ کچن کو مزید بہتری کے لئے جامع منصوبہ بندی کی بھی ہدایت کی ۔ اجلاس میں پی ای سی کمپلیکس کی پاک فضائیہ کو منتقلی کے اقدامات کا بھی جائزہ لیا گیا–
