اسلام آباد۔17جنوری (اے پی پی):وفاقی وزیر منصوبہ بندی احسن اقبال نے مردم شماری مانیٹرنگ کمیٹی کے پانچویں اجلاس کی صدارت کرتے ہوئے متعلقہ حکام کو ہدایت جاری کی ہے کہ وہ مردم شماری کی مشق کو بروقت مکمل کریں۔اجلاس میں تمام متعلقہ محکموں اور سٹیک ہولڈرز کے ممبران کمیٹی نے شرکت کی ،جس میں متعلقہ وفاقی وزارتیں، تمام صوبائی اور علاقائی حکومتوں کی انتظامیہ، ڈی جی ملٹری آپریشنز ڈائریکٹوریٹ، نادرا، این ٹی سی وغیرہ شامل تھے۔ اجلاس کا بنیادی مقصد تمام سٹیک ہولڈرز کو مردم شماری کی مشق میں ہونے والی پیشرفت ، جاری سرگرمیاں، برف باری والے علاقوں میں مردم شماری کے طریقہ کار کے بارے میں فیصلے کرنا اور مردم شماری کی ٹائم لائنز کے ساتھ قومی واقعات کو اوورلیپ کرنے کے معاملے پر فیصلے کرنا تھا۔اس موقع پر وفاقی وزیر کا کہنا تھا کہ مردم شماری ایک بہت بڑی قومی مشق ہے جس کی ٹائم لائنز پر کوئی سمجھوتہ نہیں ہوگا اور تمام متعلقہ حکام کو اس مشق کو جلد مکمل کرنے کی ہدایت کی۔ ان کا مزید کہنا تھا کہ تمام صوبوں کو آن بورڈ ہونا چاہیے اور کسی بھی تنازعہ سے بچنے اور وسائل کے موثر استعمال کے لیے تمام معاملات پر اتفاق رائے ہونا چاہیے۔چیف مردم شماری کمشنر ڈاکٹر نعیم ظفر نے 7ویں ڈیجیٹل مردم شماری سے متعلق سرگرمیوں پر پیش رفت کو تفصیل سے پیش کیا۔ انہوں نے بتایا کہ مردم شماری کے 495 امدادی مراکز قائم کیے گئے ہیں جہاں تربیت یافتہ عملہ تعینات کیا گیا ہے، صوبوں نے مردم شماری کا 120,000 فیلڈ سٹاف مختص کیا ہے، پائلٹ مردم شماری 33 اضلاع میں کامیابی کے ساتھ کی گئی جبکہ 125,500 ٹیبلٹس کو hardarned کیا گیا اور 495 مردم شماری سپورٹ سینٹر کو پہنچایا گیا۔ان کا مزید کہنا تھا کہ 7 جنوری 2023 سے 992 مقامات پر 121,000 فیلڈ سٹاف کی تربیت جاری ہے تاہم تمام صوبوں بالخصوص سندھ اور پنجاب میں حاضری میں مسائل کا سامنا کرنا پڑا ۔ انہوں نے مزید کہا کہ نادرا نے مطلع کیا ہے کہ سکیورٹی آڈٹ سمیت تمام تقاضے جلد مکمل کر لیے جائیں گے اور سکیورٹی آڈٹ کے بعد این ٹی سی کی جانب سے مطلوبہ بیک اینڈ انفراسٹرکچر کی فراہمی کے لحاظ سے self enumeration شروع کی جا سکتی ہے۔اس کے بعد مردم شماری کی ٹائم لائنز اور سکیورٹی اہلکاروں کی دستیابی کے ساتھ اوور لیپنگ قومی واقعات کو پیش کیا گیا۔
