اسلام آباد،21مئی (اے پی پی):وزیراعظم محمد شہبازشریف نے کہا ہے قوم اور شہداءکے اہل خانہ کے دِل کو جوٹھیس پہنچی ہے، اس درد کا ازالہ کریں گے۔
وزیراعظم اتوار کو سینئر سیاست دان چوہدری شجاعت حسین کی رہائش گاہ پر گئے، چوہدری شجاعت کے فرزند اور وفاقی وزیر چوہدری سالک حسین نے آمد پر وزیراعظم کا استقبال کیا ۔ وزیراعظم نے مسلم لیگ (ق) کے سربراہ چوہدری شجاعت حسین کی خیریت دریافت کی ۔
اس موقع پر وزیراعظم محمد شہبازشریف اور چوہدری شجاعت حسین نے ملکی صورتحال پر تبادلہ خیال کیا۔ وزیراعظم نے 9 مئی کے واقعات میں ملوث بلوائیوں کو سزا دینے کے حوالہ سے چوہدری شجاعت کے بیان کو سراہا ۔ ملاقات کے دوران چوہدری شجاعت حسین نے کہا کہ ہر محب وطن قومی ندامت کا باعث بننے والے ہر فرد کی سزا چاہتا ہے۔
وزیر اعظم نے یقین دہانی کراتے ہوئے کہا کہ قوم اور شہداءکے اہل خانہ کے دِل کو جوٹھیس پہنچی ہے، اس درد کا ازالہ کریں گے۔ چوہدری شجاعت حسین نے ملک کو مسائل سے نکالنے کے لئے وزیراعظم کے جذبے اورخدمات کو سراہا۔ وزیراعظم محمد شہباز شریف نے اتحادی جماعتوں کی بھرپور حمایت ، تعاون اور رہنمائی پر شکریہ ادا کیا ۔ملاقات میں چوہدری شافع حسین بھی موجود تھے۔
