گوجرانوالہ،25مئی(اے پی پی): خوراک میں جعل سازی کرنے والوں کیخلاف پنجاب فوڈ اتھارٹی کا آپریشن جاری ہے۔سیالکوٹ کے مختلف علاقوں میں ڈی جی فوڈاتھارٹی راجہ جہانگیر انور نے ٹیم کے ہمراہ فوڈ پوائنٹس کی چیکنگ کی،چیکنگ کے دوران مختلف فوڈ پوائنٹس سے2000لیٹر جعلی دودھ،740لیٹر جعلی مشروب اور200کلو آڑو تلف کیا گیاجبکہ سبزی منڈی میں اسامہ ڈیپارٹمنٹل سٹور سے740 لیٹر معروف برینڈز کے جعلی مشروب برآمد کر کے تلف کر دیے گئے۔ماڈل ٹاؤن سیالکوٹ سے 2000 لیٹرجعلی دودھ سے بھرا ٹینکر بھی پکڑا،موقع پر کیے گئے ٹیسٹ فیل ہونے پر جعلی دودھ تلف کر دیا گیا۔سبزی منڈی میں آڑوکو مضر صحت رنگ اورممنوعہ کیمیکل لگانے پر 200 کلو آڑو کو بھی تلف کر دیے گیا۔
اس حوالے سے ڈی جی فوڈاتھارٹی نے کہا کہ ناقص اشیاء خورونوش کا استعمال معدہ اور جگر کی بیماریوں کا سبب بنتی ہیں۔انہوں نے شہریوں کو مخاطب کرتے ہوۓ کہا کہ جعل سازی اور ملاوٹ کرنے والوں کے خاتمے کے لیے پنجاب فوڈ اتھارٹی کا ساتھ دیں۔شہری اپنے اردگرد موجود جعل ساز مافیا کی اطلاع پنجاب فوڈ اتھارٹی کی ہیلپ لائن 1223پردیں۔کسی بھی لحاظ سے اشیاء خوردونوش کے معیار پر سمجھوتہ نہیں کیا جائے گا۔
