اسلام آباد، 27 جون (اے پی پی ): انٹرنیشنل کرکٹ کونسل (آئی سی سی) نے کرکٹ ورلڈ کپ2023 کے آفیشل شیڈول کا اعلان کر دیا ہے ، ورلڈ کپ شیڈول آئی سی سی 100 دن کے کاؤنٹ ڈاؤن کے موقع پر جاری کیا گیا ہے ، ورلڈ کپ 12 مقامات پر کھیلا جائے گا جس میں شامل 10 ٹیمیں 9، 9 میچز کھیلیں گی۔
پہلا میچ دفاعی چیمپئن انگلینڈ اور نیوزی لینڈ کے درمیان 5 اکتوبر کو بھارت کے شہر احمد آباد میں ہوگا۔پاکستان اپنا پہلا میچ 6 اکتوبر کو کوالیفائر ون اور دوسرا میچ 12 اکتوبر کو کوالیفائر 2 کے خلاف حیدرآباد میں کھیلے گا۔شیڈول کے مطابق پاکستان اور بھارت کے درمیان مقابلہ 15 اکتوبر کو احمد آباد میں ہو گا۔
قومی ٹیم 20 اکتوبر کو آسٹریلیا کے خلاف بنگلورو کے میدان میں اترے گی،پاکستانی ٹیم 23 اکتوبر کو افغانستان، 27 اکتوبر جنوبی افریقا جبکہ 31 اکتوبر کو بنگلا دیش سے میچ کھیلے گی،پاکستانی ٹیم 4 نومبر کو نیوزی لینڈ اور 12 نومبر کو انگلینڈ سے آخری گروپ میچ کھیلے گی،15 نومبر کو ممبئی میں ورلڈ کپ کا پہلا سیمی فائنل جبکہ 16 نومبر کو دوسرا سیمی فائنل ہو گا۔ورلڈکپ فائنل 19 نومبر کو احمد آباد میں کھیلا جائے گا
آئی سی سی ورلڈکپ ٹرافی ٹور کا منفرد انداز میں آغاز ہو گیا ہے ، ٹرافی کو زمین سے ایک لاکھ 20 ہزار فٹ بلندی پر خلا میں بھیجا گیا ،جہاں سے ٹرافی احمدآباد کے اسٹیڈیم میں اتری،آئی سی سی ورلڈکپ ٹرافی آج سے بھارت کے مختلف شہروں میں لے جائی جائے گی ، ٹرافی 31 جولائی سے 4 اگست تک پاکستان کا دورہ کرے گی۔
