اوکاڑہ،11 جولائی (اے پی پی):ریسکیو 1122 اوکاڑہ نے ممکنہ سیلابی صورتحال سے نمٹنے کےلیے دریائے راوی پر ریسکیو اینڈ فلڈ ریلیف کیمپ قائم کر د یئے ، متاثرین کے انخلاء کےلیے کشتیاں بھی پہنچا دی گئیں ۔میڈیا کوآرڈینیٹر ریسکیو 1122 کے مطابق دریائے راوی میں ممکنہ سیلابی صورتحال کے پیش نظر ریسکیو 1122 کی جانب سے ریسکیو اینڈ فلڈ ریلیف کیمپ قائم کر دیئے گئے۔ گورنمنٹ ماڈل ہائی سکول گوگیرہ میں فلڈ ریلیف کیمپ قائم کیا گیا جبکہ سیلاب آنے کی صورت میں لوگوں کے انخلاء کےلیے ٹھٹھ بھٹیاں کے مقام پر کشتیاں بھی پہنچا دی گئیں۔ ڈسٹرکٹ ایمرجنسی آفیسر ظفر اقبال نے اسسٹنٹ کمشنر اوکاڑہ غلام مصطفیٰ کے ہمراہ فلڈ ریلیف کیمپ کا دورہ کیا انہوں نے جندراکہ بند کا بھی دورہ بھی کیا اوردریا میں پانی کی صورتحال کا جائزہ لیا، اسسٹنٹ کمشنر اوکاڑہ غلام مصطفیٰ نے ریسکیو 1122 کی جانب سے کیے گئے انتظامات پر اطمینان کا اظہار کیا۔
