اسلام آباد،19جولائی(اے پی پی):صدر مملکت ڈاکٹر عارف علوی نے سرکاری افسران پر زور دیا ہے کہ وہ ملک میں گڈ گورننس کے فروغ اور لوگوں کو خدمات کی فراہمی بہتر بنانے کیلئے اپنا کردار ادا کریں۔
ان خیالات کا اظہار انہوں نے کوئٹہ سے آئے ہوئے سرکاری افسران پر مشتمل مڈ کیریئر منیجمنٹ کورس کے شرکاء سے گفتگو کرتے ہوئے کیا۔ صدر مملکت نے بیوروکریسی کی جانب سے خدمات کی فراہمی بہتر بنانے کی ضرورت پر زور دیا اور کہا کہ بیورو کریسی ملکی ترقی اور عوام کی فلاح و بہبود کیلئے محنت اور اخلاص کے ساتھ کام کرے، ملکی ترقی اور لوگوں کو اِنصاف کی فراہمی کیلئے سرکاری حکام کو بروقت فیصلے لینے کی ضرورت ہے۔
صدر مملکت نے کہا کہ ہمیں بہتر اخلاق اور انکساری کی اقدار کو اپنانے کی ضرورت ہے۔ انہوں نے کہا کہ پاکستانی بیوروکریسی کو نظام بہتر بنانے اور فکری استعداد میں اضافہ کرنا ہوگا، کارکردگی میں بہتری اور موثر فیصلہ سازی کیلئے افسران خود کو جدید مہارتوں سے لیس کریں جبکہ عوام کی خدمات تک رسائی بہتر بنانے اور اداروں کی کارکردگی بڑھانے کیلئے جدید انفارمیشن ٹیکنالوجی سے استفادہ کیا جائے۔
صدر مملکت نے کہا کہ سرکاری حکام خود کو اپنے شعبے کی جدید مہارتوں سے لیس کریں اور تیز رفتار ترقی کیلئے لوگوں کی توقعات کی مطابق خدمات کی فراہمی یقینی بنائیں ۔
