اسلام آباد،21جولائی (اے پی پی):وزیراعظم محمد شہباز شریف نے زراعت، حیوانات، معدنیات، کان کنی، آئی ٹی اور توانائی کے شعبوں میں دوست ممالک کی طرف سے سرمایہ کاری کے حصول کے لئے منصوبوں کی منظوری دیتے ہوئے ہدایت کی ہے کہ ان منصوبوں پر عملدرآمد اور انہیں عملی جامہ پہنانے کے لئے دلچسپی ظاہر کرنے والے سرمایہ کاروں کو بھرپور سہولیات فراہم کی جائیں۔
معاشی بحالی پلان کے اجرا ء اورحکومت پاکستان کی جانب سے سپیشل انوسٹمنٹ فسیلی ٹیشن کونسل (ایس آئی ایف سی) کے قیام کے تسلسل میں ایپکس کمیٹی کا دوسرا اجلاس جمعہ کو منعقد ہوا۔ وزیراعظم محمد شہباز شریف کی زیرصدارت ہونے والے اجلاس میں چیف آف آرمی سٹاف جنرل سید عاصم منیر، وزراءاعلیٰ، وفاقی و صوبائی وزرا اور اعلیٰ حکام شریک ہوئے۔ ایپکس کمیٹی نے ایس آئی ایف سی کی کارکردگی اور سیمینارز کے انعقاد اور منصوبوں کے افتتاح کے ذریعے ممکنہ سرمایہ کاروں تک رسائی کی حکمت عملی پر اطمینان کا اظہار کیا۔
ایپکس کمیٹی نے وزراءکی جانب سے ایس آئی ایف سی کے تحت سرمایہ کاروں کے لئے تیار کردہ مختلف منصوبوں کا جائزہ لیا۔ اجلاس کے اختتام پر مفید گفتگو اور اتفاق رائے کے بعد وزیراعظم نے زراعت، حیوانات، معدنیات، کان کنی، آئی ٹی اور توانائی کے شعبوں میں دوست ممالک کی طرف سے سرمایہ کاری کے حصول کے لئے منصوبوں کی منظوری دی اور ہدایت کی کہ ان منصوبوں پر عمل درآمد اور انہیں عملی شکل دینے کے لئے دلچسپی دکھانے والے سرمایہ کاروں کو بھرپور سہولیات فراہم کی جائیں۔
