ملتان،25 جولائی (اے پی پی ): ڈسٹرکٹ ایمرجنسی آفیسرریسکیو 1122ملتان ڈاکٹرکلیم اللہ کی سربراہی میں محرم الحرام بالخصوص یوم عاشور کے حوالے سے ایمرجنسی کورپلان جاری کرد یا گیا ہے۔ ڈاکٹرکلیم اللہ نے کہا کہ محرم الحرم یو م عاشور کے مو قع پرضلع ملتان کے تمام ریسکیو رزہائی الرٹ رہیں گے۔
ڈسٹرکٹ ایمرجنسی آفیسر ریسکیو1122 ملتان ڈاکٹر کلیم اللہ نے ہیڈکواٹرچوک کمہارا نوالہ میں محرم الحرام کے حوالے سے کیے جانے والے انتظامات کے بارے میں اجلاس کی صدارت کی ، جس دوران انہوں نے ہدایت کی کہ حسب روایت ضلع ملتان بشمول تحصیل شجاع آباد اور جلال پورپیر والہ میں بڑی امام بارگاہوں میں ہونے والی مجالس اور ماتمی جلوسوں پر اعزاداروں کیلئے ابتدائی طبی امداد کو یقینی بنایا جائے۔
ڈسٹر کٹ ا یمرجنسی آفیسر ڈاکٹر کلیم اللہ نے 09 اور 10 محرم کیلئے کوڈ ریڈ لگانے کا حکم بھی جاری کیا اور تمام ریسکیورز کی چھٹیاں منسوخ کردیں۔انہوں نے کہا کہ ڈسٹرکٹ ملتان کے600سے زائدریسکیورز جدید آلات سے مزین ایمبولینسزاورفائروہیکلز کے ساتھ ڈیوٹی پر تعینات اورالرٹ رہیں گے، محرم الحرم میں کسی بھی ہنگامی صورت حال میں 35 ایمبولینسز،17فائروہیکلزاورریسکیووہیکلزکے علاوہ 98موبائل موٹر بائیک ایمبولینسزز ماتمی جلوسوں کے ساتھ ہونگی۔ریسکیو1122کی مزید موبائل ایمرجنسی ریسکیوپوسٹیں امام بارگاہوں اور دیگر اہم مقامات پر موجود ہونگی، اس کے علاوہ موبائل پوسٹیں اورایمبولینسز،فائروہیکلزاپنے فرسٹ ایڈ باکس کے ساتھ جلوسوں کے ہمراہ ہونگی تاکہ عزادارین کو بروقت طبی امداد مہیا کی جا سکے۔اس دوران ایمرجنسی آفیسر ایڈمن انجینئر محمد بلال، ایمر جنسی آفیسرآپریشن ارشد خان، کنٹرول روم انچارج مدثر ضیاء، اسٹیشن کوارڈنیٹرزاور شفٹ انچارجزز تمام انتظامات کی نگرانی کریں گے۔
ڈسٹر کٹ ا یمرجنسی آفیسر ڈاکٹر کلیم اللہ نے کہا کہ ریسکیو 1122کنٹرول روم چوبیس گھنٹے فعال ہے اور یوم عاشور کے دوران بھی ہر ایمرجنسی کال پر ایمرجنسی سروس کی فراہمی کا سلسلہ جاری رہے گا۔اس کے ساتھ دریائے چناب پرقائم فلڈ ریسکیو کیمپ بھی فعال رہینگے۔10 محرم الحرام کو رابطہ نہ ہونے کی صورت میں عوام لناس لینڈ لائن نمبرز سے کنٹرول روم نمبر 9220305 -061ڈائل کریں اور موقع پر موجود ریسکیو سٹاف یا قریبی کیمونٹی ریسکیو اسٹیشنوں کو ایمرجنسی کے بارے اطلاع دیں تاکہ بروقت ایمرجنسی سروس کی فراہمی کو یقینی بنایا جاسکے۔
انہوں نے تمام عزاداروں اورامام بارگاہوں کے متولیوں سے گزارش کی کہ ریسکیوٹیموں کے ساتھ تعاون کریں تاکہ بروقت طبی امداد کی فراہمی کو یقینی بنایا جا سکے۔
