اسلام آباد،10جولائی(اے پی پی):وزیراعظم محمد شہباز شریف سے جمعیت علماءِ اسلام (ف) کے سربراہ مولانا فضل الرحمٰن اور وفاقی وزیر برائے مواصلات مولانا اسعد محمود نے ملاقات کی۔ ملاقات میں موجودہ ملکی سیاسی صورتحال پر تفصیلی مشاورت کی گئی۔
مولانا فضل الرحمن اور وفاقی وزیر اسعد محمود نے گزشتہ دنوں سویڈن میں قرآن پاک کی بے حرمتی کے واقعہ پر وزیراعظم محمد شہباز شریف اور حکومتِ پاکستان کی جانب سے شدید ردعمل اور اقدامات پر وزیراعظم کو خراج تحسین پیش کیا۔ مولانا فضل الرحمٰن نے کہا کہ سویڈن کا واقعہ انتہائی افسوسناک ہے اور وزیراعظم محمد شہباز شریف اور حکومتِ پاکستان کا اس واقعہ کے حوالہ سے بیانیہ قابلِ تعریف ہے۔ انہوں نے وزیراعظم محمد شہباز شریف کی سربراہی میں اتحادی حکومت کے ملک کو معاشی مشکلات سے نکالنے اور ترقی کی راہ پر گامزن کرنے پر خراج تحسین پیش کیا۔
اس موقع پر وزیراعظم نے اتحادی جماعتوں کے کردار کو سراہتے ہوئے کہا کہ ملک کو معاشی مشکلات سے نکالنا اور آئی ایم ایف کے ساتھ معاہدہ کرنا اتحادیوں کے تعاون سے ممکن ہوا ہے۔
