اسلام آباد۔6جولائی (اے پی پی):وزیر اعظم محمد شہباز شریف نے وزارت خارجہ کو ہدایت کی ہے کہ وہ ڈاکٹر عافیہ کی دیکھ بھال اور ان کی جلد رہائی کے لیے امریکی حکومت کے ساتھ ساتھ واشنگٹن میں پاکستانی مشن کے ساتھ مکمل طور پر رابطے میں رہیں۔ وزیراعظم نے ایک وزارتی کمیٹی تشکیل دی جو ڈاکٹر عافیہ کی جلد رہائی کے لیے کوششیں تیز کرے گی۔جمعرات کو وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف سے ڈاکٹر عافیہ صدیقی کی بہن ڈاکٹر فوزیہ صدیقی نے ملاقات کی۔ گزشتہ تین مہینوں میں وزیراعظم سے ڈاکٹر فوزیہ کی یہ دوسری ملاقات تھی۔ اس سے قبل وزیراعظم نے ڈاکٹر فوزیہ صدیقی سے ان کی ایف ایم سی جیل میں ڈاکٹر عافیہ صدیقی سے ملاقات کے لیے امریکا روانگی سے قبل ملاقات کی تھی۔ ڈاکٹر فوزیہ نے وزیر اعظم کی قیادت اور تعاون پر شکریہ ادا کیا ۔ وزیراعظم کی ہدایت پر وزارت خارجہ کی طرف سے ڈاکٹر فوزیہ صدیقی کو امریکی ویزے میں مدد فراہم کی گئی اور امریکی جیل میں ڈاکٹر عافیہ سے ان کی ملاقاتوں کا اہتمام کیا گیا۔ ڈاکٹر فوزیہ نے کہا کہ میرے دورے کے لیے امریکی ویزا کے حصول میں میری مدد کرکے آپ نے ڈاکٹر عافیہ کی رہائی کی بنیاد رکھ دی ہے۔ تقریباً پندرہ سال قبل قید ہونے کے بعد سے اپنی بہن سے ملنے کا یہ پہلا موقع تھا اور مسلسل تین دن تک ان سے ملاقات رہی۔ انہوں نے وزیراعظم کو ڈاکٹر عافیہ کی جلد رہائی کے لیے کیے جانے والے مجوزہ اقدامات کے بارے میں بتایا۔ ڈاکٹر فوزیہ نے اپنی بہن ڈاکٹر عافیہ سے ملاقات کے تاثرات بیان کیے تو وزیراعظم نے ہمدردی سے انہیں سنا۔ وزیراعظم نے اس بات پر زور دیا کہ حکومت ان کی بہن کے لیے انصاف کے حصول کی جدوجہد میں ان کے ساتھ بھرپور تعاون کرنے کے لیے پرعزم ہے اور ڈاکٹر عافیہ صدیقی کی خیریت اور رہائی کو یقینی بنانے کے لیے ہر ممکن کوشش کرے گی۔ وزیر اعظم شہباز شریف نے وزارت خارجہ کو ہدایت کی کہ وہ ڈاکٹر عافیہ کی دیکھ بھال اور ان کی جلد رہائی کے لیے امریکی حکومت کے ساتھ ساتھ واشنگٹن میں پاکستانی مشن کے ساتھ مکمل طور پر رابطے میں رہیں۔ انہوں نے وزارت خارجہ کو یہ بھی ہدایت کی کہ وہ ڈاکٹر فوزیہ کے اگلے دورہ امریکہ کے لیے مکمل تعاون فراہم کرے، وزیراعظم نے ایک وزارتی کمیٹی تشکیل دی جو ڈاکٹر عافیہ کی جلد رہائی کے لیے کوششیں تیز کرے گی۔
