گوجرانوالہ،24جولائی (اے پی پی): ڈی جی فوڈ اتھارٹی راجہ جہانگیر انور کی ہدایت پر فوڈ سیفٹی ٹیموں نے حافظ آباد روڈ پر واقع واٹرفلٹریشن پلانٹ پر چھاپہ مارا ، کارروائی کے دوران قوانین کی خلاف ورزی پر یونٹ بندکر دیا گیا، یونٹ میں موجود 15ہزار 900لیٹر پانی کی بوتلیں اور 10 کلوجعلی لیبل ضبط کر لیے گئے، پرانے ناکارہ فلٹر ز سے ناقص پانی بوتلوں میں بھرا جا رہا تھا۔
ڈی جی فوڈ اتھارٹی کے مطابق یونٹ میں فلٹرز تبدیلی اور بوتل واشنگ ریکارڈ بھی عدم موجود پایا گیا جبکہ پانی کی لیبارٹری ٹیسٹ رپورٹ ناہونے پر کارروائی عمل میں لائی گئی۔ ان کا کہنا تھا کہ بنیادی ضرورت پانی میں جعل سازی کرنے پر مالک کے خلاف مقدمہ درج کروا دیا گیا ہے ، قوانین کے مطابق پانی فلٹر کیے بغیر پیک کر کے فروخت کرنا سنگین جرم ہے۔
ڈی جی فوڈ اتھارٹی راجہ جہانگیر انور نے کہا کہ ناقص پانی کا استعمال ہیضہ،ہیپاٹائٹس جیسی موذی بیماری کا باعث بن سکتا ہے۔انہوں نے کہا کہ جعلسازوں کے خلاف سخت کریک ڈاؤن جاری رہے گا۔
