ڈیرہ غازی خان، 31 اگست(اے پی پی): بچوں کو بیماریوں سے بچاؤ اور حفاظتی اقدامات کے حوالے سے پنجاب حکومت اور یونیسف کے اشتراک سے نجی ہوٹل میں سیمینار کا انعقاد کیاگیا۔
پاکستان میں یونیسیف کے کنسلٹنٹ برائے سماجی کردار عقیل سرفراز نے بریفنگ دیتے ہوئے بتایا کہ بچوں کی زندگی کے ابتدائی دو سال انتہائی اہم ہوتے ہیں،اس دوران بچوں کو بیماریوں سے بچانے کیلئے حفاظتی ٹیکہ جات بہت ضروری ہیں۔ انہوں نے کہا کہ موثر ٹیکہ جات کی مہم کو کامیاب بنانے میں میڈیا کا کلیدی کردار ہے اور جدید ڈیجیٹل کیمونیکیشن ٹرینڈز کی بدولت بھی ہم مہم کو کامیاب بنا سکتے ہیں۔ اس موقع پر ڈائریکٹر جنرل ہیلتھ جنوبی پنجاب ڈاکٹر مہر محمد اقبال نے کہا کہ بچے ہمارا اثاثہ اورمستقبل ہیں،انہیں بیماریوں سے محفوظ رکھنا ہماری ذمہ داری ہے،جدید دور میں میڈیا کے تعاون کے بغیر کوئی مہم کامیاب نہیں ہوسکتی۔
ایڈیشنل ڈائریکٹر علی رضا مختار نے کہا کہ ہیلتھ سیکٹر میں طبی سہولیات کی شہریوں تک باآسانی رسائی کو یقینی بنایا جارہا ہے۔
تقریب میں ڈائریکٹر جنرل ہیلتھ جنوبی پنجاب ڈاکٹر مہر محمد اقبال، ایڈیشنل ڈائریکٹر ہیلتھ علی رضا مختار،ایس بی کنسلٹنٹ یونیسیف عقیل سرفراز،ہیلتھ آفیسر یونیسف ڈاکٹر سائرہ خان، سی ای او ہیلتھ ڈاکٹر ادریس لغاری،ڈی ایچ او ڈاکٹر علی ہاشم اور میڈیا کے نمائندوں نے شرکت کی۔
