کراچی۔22اگست (اے پی پی):نگراں وزیراعظم انوار الحق کاکڑ نے کہا ہے کہ کراچی کے مسائل کے حل کے لیے تمام وسائل کو ہرممکنہ طور پر بروئے کار لایا جائے گا۔ منگل کو وزیراعظم آفس کے میڈیا ونگ کے جاری بیان کے مطابق نگراں وزیراعظم انوار الحق کاکڑ سے متحدہ قومی موومنٹ کے وفد نے ملاقات کی۔ وفد نے انوار الحق کاکڑ کو وزارت عظمیٰ کا منصب سنبھالنے پر مبارکباد پیش کی اور نیک خواہشات کا اظہار کیا ۔ ملاقات میں ملک کی اقتصادی، معاشی اور معاشرتی صورتحال، بین المذہبی ہم آہنگی اور دیگر موضوعات پر تفصیلی گفتگو کی گئی۔ وفد نے نگراں وزیراعظم کی توجہ کراچی میں حد بندی کے مسئلے اور پانی کی قلت کے دیرینہ مسئلے کی جانب مبذول کرائی۔ وزیراعظم نے وفد کو یقین دلایا کہ کراچی کے مسائل کے حل کے لیے تمام وسائل کو ہرممکنہ طور پر بروئے کار لایا جائے گا۔ ملاقات میں گورنر سندھ کامران خان ٹیسوری بھی موجود تھے۔ ایم کیو ایم کے وفد میں فاروق ستار، سید امین الحق، خواجہ اظہار الحسن اور دیگر شامل تھے۔
