ملتان، 30 ستمبر(اے پی پی ): کمشنر انجینئر عامر خٹک نے کہا ہے کہ انسداد پولیو مہم 2 اکتوبر تا 6 اکتوبر تک جاری رہے گی ۔انہوں نے کہا کہ ملتان ڈویژن میں10829 ٹیمیں25 لاکھ سے زائد بچوں کو پولیو سے بچاؤ کے قطرے پلائیں گی۔
کمشنر نے کہا ضلع ملتان میں 4380 ٹیمیں 1000089 بچوں کو پولیو سے بچاؤ کے قطرے پلائیں گی۔ انہوں نے کہا کہ پولیو فری پاکستان کیلئے والدین کا تعاون ناگزیر ہے ، اپنے بچوں کو عمر بھر کی معذوری سے بچانے کیلئے پولیو سے بچاؤ کے قطرے پلائیں۔انہوں نے کہا کہ پولیو قطرے پلانے سےانکار کرنے والے والدین کے خلاف سخت قانونی کارروائی ہوگی۔
کمشنر انجینئر عامر خٹک نے کہا کہ جنرل بس سٹینڈ سمیت عوامی مقامات پر پولیو کیمپ بھی قائم کئے گئے ہیں۔انہوں نے کہا ڈویژن میں پولیو سے متاثرہ کوئی کیس رپورٹ نہیں ہوا ہے۔
