اسلام آباد،05ستمبر(اے پی پی ):نگران وزیر داخلہ سرفراز احمد بگٹی نے کہا ہے کہ ملک میں امن وامان کا قیام حکومت کی اولین ترجیح ہے، کسی بھی فرد یا گروہ کی جانب سے تشدد پسندانہ سرگرمیوں کو ہرگز برداشت نہیں کیا جائے گا۔
ان خیالات کا اظہار نگران وزیر داخلہ سرفراز احمد بگٹی نے وزیر اعظم کی جانب سے دیئے گئے اہداف پر جائزہ اجلاس کی صدارت کرتے ہوئے کیا۔ وزیر داخلہ نے کہا کہ پاکستان میں غیر قانونی طور پر مقیم غیرملکیوں کی وطن واپسی کیلئے جامع حکمت عملی مرتب کی جائے۔انہوں نے کہا کہ پاک ایران سرحد پر تین مزید بارڈر کراسنگ کھولنے کے حوالے سے ایکشن پلان جلد از جلد مکمل کیا جائے۔
نگران وزیر داخلہ سرفراز احمد بگٹی نے کہا کہ پولیس اور سیکیورٹی اداروں کی کارکرکردگی بہتر بنانے کیلئے ان کے دائرہ کار کا واضح تعین انتہائی ضروری ہے، سول آرمڈ فورسز کی بہتری کیلئے جدید ترین تربیت اور وسائل فراہم کریں گے۔انہوں نے کہا کہ غیر ملکیوں کو فول پروف سکیورٹی کی فراہمی کو یقینی بنایا جائے ۔
اجلاس میں وزیر داخلہ کی جانب سے مختلف منصوبوں پر کام کرنے والے غیرملکیوں کی سکیورٹی کے ضابطہ اخلاق کو حتمی شکل دے کر عملدرآمد یقینی بنانے کی ہدایت کی گئی ۔انہوں نے کہا کہ کاروباری اور سرمایہ کاری کیلئے ویزا درخواست گزاروں کو ہر ممکن سہولت فراہم کی جائے۔
وزیر داخلہ کی ہدایت پر نیشنل ایکشن پلان پر عملدرآمد کیلئے آئندہ ہفتے اجلاس طلب کر لیا گیا۔سیکرٹری انسداد منشیات ڈویژن منیر اعظم ، سپیشل سیکرٹری داخلہ ندیم محبوب، ڈی جی اے این ایف میجر جنرل محمد انیق الرحمن ملک سمیت ڈی جی ایف آئی اے محسن حسن بٹ ، نیشنل کوآرڈینیٹر نیکٹا طاہر رائے اور دیگر اعلیٰ افسران نے اجلاس میں شرکت کی۔
