اسلام آباد۔5ستمبر (اے پی پی):نگران وزیر اعظم انوار الحق کاکڑ نے سمگلنگ کی روک تھام کیلئے کسٹمز حکام کو غیر منظم سرحدی راستوں پر نگرانی کا نظام قائم کرنے کی ہدایت کی ہے۔ وزیراعظم آفس کے میڈیا ونگ سے جاری بیان کے مطابق انہوں نے یہ ہدایت منگل کو یہاں وزارت تجارت کی جانب سے دی جانے والی بریفنگ کے دوران کی۔ وزیراعظم کو بریفنگ میں ملکی برآمدات بڑھانے کے لئے مختلف مجوزہ حکمت عملیوں کے بارے میں آگاہ کیا گیا۔ بریفنگ میں وزارتِ تجارت کی جانب سے ملک میں سمگلنگ کے سد باب کے لئے ممکنہ حکمت عملیاں پیش کی گئیں۔ تجارتی سامان کی بہتر سکیننگ اور معائنہ کی استعداد بہتر بنانے کی تجاویز بھی پیش کی گئیں۔ بریفنگ میں افغانستان ٹرانزٹ ٹریڈ ایگریمنٹ کے تحت ہونے والی تجارت کےمختلف پہلوؤں کا بھی جائزہ لیا گیا۔ ملک میں سمگلنگ کی حوصلہ شکنی اور قانونی راستوں سے تجارت کے فروغ کے لئے متعدد اقدامات زیر بحث آئے۔ وزیراعظم نے ملک میں سمگلنگ کی روک تھام کے لئے کسٹمز حکام کو غیر منظم سرحدی راستوں پر نگرانی کا نظام قائم کرنے کی بھی ہدایت کی۔
