نوشہرہ ورکاں،25 اکتوبر( اے پی پی):حکومت پنجاب کی ہدایت پر تحصیل ہیڈکوارٹر ہسپتال نوشہرہ ورکاں میں چار روزہ ہفتہ صحت تیسرے روز بھی منایا جا رہا ہے۔ہفتہ صحت کیمپ میں بنیادی تشخیصی ٹیسٹ ہیپاٹائٹس، ایڈز، ٹی بی ،دمہ، شوگر ، ملیریا، غذائی قلت کی تشخیص ،جنرل چیک اپ، پی سی آر کے مفت ٹیسٹ بچوں و حاملہ خواتین کو حفاظتی ٹیکے سمیت صحت مند طرز زندگی بارے معلومات بھی فراہم کی جائیں گی اور ہفتہ صحت کے آغاز سے ہی مریضوں کا رش دیکھنے میں آیا۔
اس سلسلے میں میڈیکل سپریٹنڈنٹ ڈاکٹر مقصود ظفر مان نے کہا کہ ہفتہ صحت منانے کا مقصد لوگوں کو ہیلتھ سکریننگ کی سہولیات ان کی دہلیز پر بلاامتیاز مفت فراہم کرنا ہے کیونکہ بہت سے مریض اپنی بیماریوں سے لاعلم ہوتے ہیں، اسکریننگ ٹیسٹ سے انکی بیماریوں کی تشخیص کے بعد ان کا فری علاج بھی کیا جائے گا۔
ایم ایس ڈاکٹر مقصود ظفر مان کا کہنا ہے کہ روزانہ کی بنیاد پر پانچ سو سے زائد مریض چیک اپ کرا رہے ہیں۔ انہوں نے شہریوں سے اپیل کی کہ وہ نوشہرہ ورکاں تحصیل ہیڈ کواٹر ہسپتال میں لگے چار روزہ ہفتہ صحت کیمپ میں اپنی ہیلتھ سکریننگ لازمی کرائیں اور صحت مند معاشرے کا فرد بن کر رہیں۔
