نگران وزیراعظم انوار الحق کاکڑ کا تین اضلاع میں پولیو وائرس کی موجودگی پراظہار تشویش،تمام سٹیک ہولڈرزکو انسدادپولیو آگہی مہم میں شامل کرنے کی ہدایت

20

اسلام آباد،2اکتوبر(اے پی پی):نگران وزیراعظم انوارالحق کاکڑ نے ملک کے تین اضلاع میں پولیو وائرس کی موجودگی  پر تشویش کااظہار کرتےہوئے کہا ہے کہ علماء، اساتذہ، والدین سمیت  تمام سٹیک ہولڈرزکو انسدادپولیو کی آگہی مہم میں شامل کیاجائے۔

 پیر کو نگران وزیرِ اعظم انوار الحق کاکڑ کی زیرِ صدارت انسداد پولیو کیلئے نیشنل ٹاسک فورس کا اجلاس منعقد ہوا۔ وزیراعظم نے اجلاس سے خطاب کرتےہوئے کہا کہ پولیو کے ملک سے مکمل خاتمے کیلئے معاشرے کے ہر طبقے کو اس قومی فریضے میں اپنا کردار ادا کرنا ہوگا۔ ملک کے بچوں کے محفوظ اور صحتمند مستقبل کیلئے ہر کسی کو اس مقدس مشن کا حصہ بننا ہوگا ۔ انہوں نے ہدایت کی کہ علما ، اساتذہ، والدین اور تمام  سٹیک ہولڈرز کو انسداد پولیو کی آگہی مہم کا حصہ بنایا جائے۔

وزیراعظم نے قانون نافذ کرنے والے اداروں کو ہدایت کی کہ انسداد پولیو مہم کے دوران پولیو ورکرز کی سکیورٹی یقینی بنائی جائے۔ انہوں نے کہا کہ ملک میں پولیو کے کیسز میں نمایاں کمی آئی ہے مگر ملک سے اس موذی مرض کے جڑ سے خاتمے تک ہم اپنی بھرپور کوششیں جاری رکھیں گے، قوم کیلئے سب سے بڑا خوشی کا دن وہ ہوگا جب ملک کا بچہ بچہ اس خطرناک مرض سے مکمل طور پر محفوظ ہوگا، یہ مسلمہ حقیقت ہے کہ تمام علماء کرام بشمول امام کعبہ نےبھی پولیو سے بچاؤ کے قطروں کو بالکل محفوظ اور بچوں کے معذوری سے پاک مستقبل کیلئے انتہائی ضروری قرار دیا ہے۔

وزیرِ اعظم نے ملک کے تین اضلاع میں پولیو وائرس کی موجودگی پرتشویش کا اظہار کرتےہوئے ہدایت کی کہ جن اضلاع میں پولیو وائرس کی موجودگی کی اطلاع ہے وہاں خصوصی انسداد پولیو مہم چلائی جائے۔انہوں نے کہاکہ پولیو وائرس کے خلاف جنگ ہمارے مستقبل کے بقا کی جنگ ہے جسے ہمیں ہر قیمت پر جیتنا ہوگا۔

وزیراعظم نے انسداد پولیو کے قومی پروگرام میں بڑھ چڑھ کر شرکت کرنے اور کلیدی تعاون پر  تمام بین الاقوامی شراکت داروں کا شکریہ ادا کیا ۔

اجلاس کو بتایا گیا کہ 2022 میں ملک میں رپورٹ ہوئے 20 کیسز کی بہ نسبت رواں سال ابھی تک صرف دو کیسز رپورٹ ہوئے ہیں جس کی بڑی وجہ قومی سطح پر انسداد پولیو مہمات کا تسلسل اور حکومتی سطح پر کوششیں ہیں۔ وزیرِ اعظم نے وزارت صحت، نیشنل ٹاسک فورس، صوبائی حکومت و انتظامیہ اور قانون نافذ کرنے والے اداروں کی انسداد پولیو کیلئے کوششوں کو سراہا۔

اجلاس کو صوبائی وزرا اعلی اور چیف سیکریٹریز نے پولیو کی صوبوں میں موجودہ صورتحال اور حکومتی کوششوں سے آگاہ کیا۔اجلاس کو یہ بھی بتایا گیا کہ سندھ، پنجاب اور بلوچستان، بشمول گلگت بلتستان اور آزاد جموں و کشمیر ، پولیو سے بالکل پاک ہے جبکہ رواں سال خیبر پختونخوا میں اب تک صرف بنوں میں دو کیسز کی نشاندہی ہوئی ہے۔

اجلاس میں نگران وفاقی وزیرِ صحت ڈاکٹر ندیم جان، نیشنل ٹاسک فورس کے اعلی ٰحکام، چاروں صوبوں کے نگران وزرائےاعلی، چیف سیکریٹریز، قانون نافذ کرنے والے اداروں کے نمائندوں اور متعلقہ اعلی حکام نے شرکت کی۔