ملتان، 30 اکتوبر (اے پی پی):ویمن یونیورسٹی ملتان کے ڈائریکٹوریٹ سٹوڈنٹس افیئرز کے زیراہتمام فلسطینیوں اور مقبوضہ جموں کشمیر کے بہن بھائیوں پر جاری بربریت کی مذمت کے لئے واک کا اہتمام کیا گیا۔ جس کی قیادت وائس چانسلر پروفیسرڈاکٹر کلثوم پراچہ اور رجسٹرار پروفیسر ڈاکٹر میمونہ خان نے کی۔ واک میں طالبات، سٹاف اور فیکلٹی ممبران کی بڑی تعداد نے شرکت کی۔وائس چانسلر پروفیسر ڈاکٹر کلثوم پراچہ نے اسرائیلی حملوں کے نتیجے میں فلسطین میں ہونے والے جانی نقصان پر گہرے دکھ کا اظہار کیا اور غزہ کی سرزمین پر ہونے والے بم دھماکوں کی شدید الفاظ میں مذمت کی۔ انہوں نے کہا کہ انسانی حقوق کے دعویداروں کو مقبوضہ کشمیر اور فلسطینی مسلمانوں کے انسانی حقوق کی پامالی دکھائی نہیں دیتی تاہم اقوام عالم یہ جان لے کہ کشمیراور فلسطین میں ظلم و بربریت سے حق کی آواز کو دبایا نہیں جاسکتا۔انہوں نے عالمی برادری سے مطالبہ کیا ہے کہ وہ اسرائیلی مظالم کا نوٹس لے اور انہیں روکنے کے لیے اقدامات کرے۔ وائس چانسلر پروفیسر ڈاکٹر کلثوم پراچہ نے شرکاء سے بھی اپیل کی کہ وہ کمزور فلسطینی آبادی کی مالی مدد کے لئے ہر ممکن تعاون کریں۔رجسٹرار پروفیسر ڈاکٹر میمونہ خان نےطالبات کو یوم سیاہ کشمیر کی تفصیلات سے آگاہ کیا کہ کس طرح 27 اکتوبر 1947 کو بھارتی افواج نے جموں و کشمیر پر غیرقانونی قبضہ کیا، اسی کی مناسبت سے اس دن کو دنیا بھر میں کشمیری یوم سیاہ کے طور پر مناتے ہیں تاکہ دنیا کو یہ توانا پیغام دیا جائے کہ وہ جموں و کشمیر پر بھارت کے غیر قانونی قبضے کو یکسر مسترد کرتے ہیں۔ واک کے شرکاء نے کہا کہ فلسطین فلسطینیوں کا وطن ہے اور اسرائیل ایک ناجائز ریاست ہے ایسے وقت میں پاکستانی عوام فلسطین کے ساتھ کھڑی ہے اور اپنے مظلوم فلسطینی بھائیوں اور بہنوں کی مکمل حمایت کرتے ہیں۔ طالبات نے مختلف پلے کارڈز ، بینرز اور فلسطینی پرچم اٹھا رکھے تھے جن پرکشمیر پر بھارتی غاصبانہ تسلط اور مظالم کو اجاگر کیا گیا تھا۔طالبات نے مظلوم فلسطینیوں سے اظہار یکجہتی کرتے ہوئے اسرائیلی مظالم کے خلاف نعرے لگائے ۔آخر میں وائس چانسلر پروفیسر ڈاکٹر کلثوم پراچہ نے فلسطین اور کشمیر میں امن و سلامتی کے لئے دعا کرائی۔
