ڈیرہ غازی خان ، 31 اکتوبر (اے پی پی): سبزی و فروٹ منڈیوں میں نیلامی کے عمل کو شفاف بنانے اور موثر نگرانی کے لیے قائمقام ڈپٹی کمشنر میاں رضوان نذیر نے سبزی و فروٹ منڈی سرور والی کا دورہ کیا۔ انہوں نے سبزیوں اور پھلوں کی نیلامی کا موقع پر جائزہ لیا۔
اس موقع پرقائمقام ڈپٹی کمشنر میاں رضوان نذیر نے کہا کہ ہم حکومت پنجاب کی ہدایت پر خود ساختہ مہنگائی پر قابو پانے کے لیے منڈیوں کی نگرانی کر رہے ہیں تاکہ عوام کو ریلیف مل سکے۔انہوں نے کہا کہ ہم قیمتوں میں کمی کا فائدہ براہ راست عوام تک پہنچا رہے ہیں،نیلامی کے عمل کی مانیٹرنگ سے قیمتوں کو اعتدال میں رکھنے میں مدد ملتی ہے۔
میاں رضوان نذیر نے کہا سبزیوں و پھلوں کے تھوک و پرچون ریٹ میں چیک اینڈ بیلنس ضرور ہونا چاہیئے اور کسی کو بھی اوورچاجنگ نہیں کرنے دینگے۔انہوں نے کہا کہ منڈی کی صفائی و ستھرائی میں مزید بہتری لا رہے ہیں اور بغیر ریٹ لسٹ کسی کو بھی خرید و فروخت کی اجازت نہیں دیں گے ۔انہوں نے سبزی و فروٹ منڈی میں معاملات میں مزید بہتری کی بھی ہدایات دیں۔
