نوشہرہ ورکاں،27 اکتوبر( اے پی پی): حکومت پنجاب کی ہدایت پر تحصیل ہیڈکوارٹر ہسپتال نوشہرہ ورکاں میں لگائے گئے چار روزہ ہفتہ صحت کیمپ سے بلا تفریق مستحق اور غیر مستحق افراد مرد خواتین نے بیماریوں سے نجات کے لیے مسیحائی ماحول میں خوب فائدہ اٹھایا اور چار روزہ ہفتہ صحت میں 22 سو سے زائد مریضوں نے مفت میڈیکل سہولتوں کا فائدہ لیا۔
میڈیکل سپریڈنٹ تحصیل ہیڈ کواٹر ہسپتال نوشہرہ ورکاں ڈاکٹر مقصود ظفر مان کی کمانڈ اور اسسٹنٹ کمشنر نوشہرہ ورکاں محمد نوید حیدر کی نگرانی اور پر وقار افتتاح کے بعد میڈیکل ٹیم نے ہفتہ صحت منانے کا مقصد پورا کر دیا۔ لوگوں کو ہیلتھ سکریننگ کی سہولیات ان کی دہلیز پر بلاامتیاز مفت فراہم کی گئیں۔
بہت سے مریض اپنی بیماریوں سے لاعلم ہوتے ہیں اسکریننگ ٹیسٹ سے انکی بیماریوں کی تشخیص کے بعد ان کا مفت علاج بھی کیے جانے اور مفت ادویات فراہم کرنے کا ہفتہ صحت کیمپ میں بنیادی مقصد رکھا گیا تھا اور بنیادی تشخیصی ٹیسٹ ہیپاٹائٹس، ایڈز، ٹی بی ،دمہ، شوگر ، ملیریا، غذائی قلت کی تشخیص ،جنرل معائنہ، پی سی آر کے مفت ٹیسٹ بچوں و حاملہ خواتین کو حفاظتی ٹیکے سمیت صحت مند طرز زندگی بارے معلومات دیں گئیں۔
ہفتہ صحت کے آغاز سے ہی مریضوں کا رش دیکھنے میں آیا اور میڈیکل ٹیم نے کامیاب ہفتہ صحت پروگرام مکمل ہونے پر ایک دوسرے مبارکباد دی۔
