سرگودھا،20نومبر( اے پی پی): نیشنل کمیشن برائے انسانی حقوق نے ایس او ایس چلڈرن ویلج میں سرگودھا یونیورسٹی کے اشتراک سے بچوں کے عالمی دن کے موقع پر تقریب کا انعقاد کیا۔
اس موقع پر ڈپٹی ڈائریکٹر نیشنل کمیشن برائے انسانی حقوق عمر دراز جھاوری نے کہا آج پاکستان سمیت دُنیا بھر میں بچوں کا عالمی دن منایا جا رہا ہے، اس دن کو منانے کا بنیادی مقصد عالمی سطح پر بچوں کی تعلیم، صحت، تفریح اور ذہنی تربیت کے حوالے سے شعور اُجاگر کرنا ہے تاکہ یہ بچے مستقبل میں معاشرے کے مفید شہری بن سکیں۔
انہوں نے کہا کہ اس سال عالمی یوم ِاطفال کا موضوع ”ہر بچے کی شمولیت“ ہے جس کا مقصد اس بات پر زور دینا ہے کہ ہر بچہ چاہے وہ کسی بھی معاشرے، برادری یا قومیت سے تعلق رکھتا ہو، مساوی حقوق کا حقدار ہے۔
اس موقع پر اسٹیشن منیجر ایسوسی ایٹیڈ پریس آف پاکستان (اے پی پی) مخدوم شاہ لطیف قریشی کا کہنا تھا کہ ملک میں چائلڈ لیبر ایکٹ تو موجود ہے لیکن پھر بھی ہوٹلوں، کارخانوں، اینٹوں کے بھٹوں اور ورکشاپس پر بچوں سے مشقت کرائی جاتی ہے جو کہ اُن ننھی کلیوں کے ساتھ سراسر ظلم ہے۔انہوں نے کہا کہ حکومت چائلڈ لیبر ایکٹ کی خلاف ورزی کرنے والوں کے خلاف سخت اقدامات اُٹھا رہی ہے، بچوں کا دن آپﷺ سے شروع ہوا کیونکہ آپ ﷺنے یتیم بچوں کے سر پر ہاتھ رکھ کر فرمایا کہ یتیم بچے پر پیار سے ہاتھ رکھیں اور جتنے ہاتھ کے نیچے بال آئیں گے اتنی آپکو نیکیاں ملیں گی۔
اس موقع پر مختلف اداروں کے سربراہان جس میں چیئرمین میڈیا سٹڈیز سرگودھا یونیورسٹی نعمان یاسر،حسن رضا، ڈائریکٹر پبلک ریلیشنز سرگودھا محمد نعیم ملک اور چیئرپرسن سوشل میڈیا یونیورسٹی آف سرگودھامیڈم بینش اور اسسٹنٹ ڈائریکٹر این سی ایچ ڈی سرگودھا آصف تارڈ،محمد اقبال،میڈم آمنہ طاہر،انچارج تحفظ مرکز سرگودہا پولیس شیخ صفدراوراے ایس پی سٹی سرکل عبدالسمیع نے شرکت کی۔
