اسلام آباد،24نومبر (اے پی پی):نگران وفاقی وزیر داخلہ سرفراز احمد بگٹی نے کہا ہے کہ پاکستانی عوام سرزمین حجاز سے بے حد پیار کرتے ہیں اور خادمین حرمین شریفین سے بے پناہ عقیدت رکھتے ہیں۔
وہ امام کعبہ ڈاکٹر صالح بن عبداللہ بن حمید سے گفتگو کررہے تھے جنہوں نے وزیر داخلہ سے ان کی رہائش گاہ پر ملاقات کی۔وزیر داخلہ نے امام کعبہ کا پر تپاک خیر مقدم کرتے ہوئے کہا کہ آپ کی میرے گھر آمد میری خوش قسمتی اور پورے خاندان کےلئے باعث سعادت ہے۔انہوں نےکہا کہ پاک سعودی تعلقات مشترکہ عقیدے، تاریخ اور عوامی روابط پر محیط ہیں، پاکستان سعودی عرب کے ساتھ برادرانہ تعلقات کو انتہائی قدر کی نگاہ سے دیکھتا ہے۔
امام کعبہ نے کہا کہ مسلمان عقیدہ توحید پر کامل یقین رکھتے ہیں،معمولی اختلافات کو نفاق کا باعث نہیں بننے دینا چاہیے، امت کے درمیان اتحاد کو فروغ دینے کی ضرورت ہے۔ انہوں نےکہا کہ امت مسلمہ کو درپیش مسائل کی بڑی وجہ فرقہ واریت اور غیر ضروری اختلافات ہیں، ایک دوسرے کی رائے کا احترام کرنا اور باہمی ہم آہنگی کو فروغ دینا ہو گا، ایک دوسرے کے دل جیتیں نہ کہ اپنی رائے مسلط کریں۔
