پنڈی بھٹیاں ،15 نومبر (اے پی پی ):موٹروے پولیس نے کارروائی کے دوران کروڑں روپے مالیت کی منشیات برآمد کر کے دو ملزمان کو گرفتار کر لیا ہے۔
ترجمان موٹر وے پولیس کے مطابق اے این ایف فیصل آباد نے موٹروے پولیس کو منشیات سمگلنگ کی معلومات دی تھیں جس پر موٹروے پولیس کے ڈی ایس پی خرم شاہ اور پٹرولنگ آفیسرعمران تبسم نے سیال موڑ کے قریب کار کو رکنے کا اشارہ کیا تھا، ڈرائیور نے رکنے کی بجائے رفتار بڑھا کر فرار ہونے کی کوشش کی جس پر موٹروے پولیس نے کار کا تعاقب کر کے فرار ہونے کی کوشش ناکام بنا دی۔ کار سوار دو ملزمان نے پنڈی بھٹیاں انٹرچینج کے قریب کار چھوڑ کر کھیتوں میں فرار ہونے کی کوشش کی لیکن پٹرولنگ افسران نے تعاقب کر کے فرار ہونے والے دونوں ملزمان کو گرفتار کر لیا۔
گرفتار ہونے والے اسمگلروں میں آساتم خان اور صدیق اکبر شامل ہیں، کار کی تلاشی لینے پر اعلی معیار کی ہیروئین 7 کلو775گرام برآمد ہوئی جو کہ ملزمان نے کار کے خفیہ خانوں میں چھپا رکھی تھی، ہیروئین کی مالیت عالمی مارکیٹ میں کروڑوں روپے بتائی جاتی ہے۔
موٹروے پولیس نے قانونی کارروائی کے بعد گرفتار ملزمان، برآمد شدہ ہیروئین اور کار کو اے این ایف فیصل آبادکے حوالے کردیا ہے۔
