لاہور،22 دسمبر(اے پی پی): الحمرا آرٹس کونسل میں پاکستان میں تعینات ہونے والے پہلے ترک سفیر یحییٰ کمال کی یادگاری تصاویر کی نمائش کا انعقاد کیا گیا۔صوبائی وزیر ہاؤسنگ ،اوقاف و مذہبی امور ، زکوٰة وعشر بیرسٹر سید اظفر علی ناصر نے بطور مہمان خصوصی شرکت کی۔ ترکیہ کے قونصل جنرل درمش باشتگ نے صوبائی وزیر کو نمائش کے متعلق بریفنگ دی۔تصویری نمائش میں قائدِ اعظم کے ترکیہ کے ساتھ سفارتی تعلقات سےمتعلق خطوط و پیغامات بھی آویزاں کئے گئے۔
اس موقع پر صوبائی وزیر بیرسٹر سیداظفر علی ناصر نے اظہار خیال کرتے ہوئے کہا کہ ہم پاکستان میں پہلے ترک سفیر یحییٰ کمال کی خدمات کو خراجِ عقیدت پیش کرتے ہیں، پاک ترک تعلقات صرف 75 سال نہیں بلکہ صدیوں پرانے ہیں۔ انہوں نے کہا ہم دو ملک ضرور ہیں مگر ہمارے نظریے کی بنیاد ایک ہے، ہم رہن،سہن اور ثقافت میں ایک جیسے ہیں، ترکیہ اور پاکستان ثقافت اور تاریخ کے مختلف مقامات پر ایک دوسرے سے بڑی حد تک مشابہت رکھتے ہیں۔
انہوں نے کہا کہ اس نمائش سے دونوں ممالک کے مشترکہ ماضی کو نئی نسلوں کو منتقل کرنے میں بڑی مدد ملے گی۔ دونوں ممالک نے ماضی میں ایک دوسرے کے ہر مشکل وقت میں مدد کی ہے۔
