اسلام آباد،26 دسمبر(اے پی پی): نگران وفاقی وزیر اطلاعات و نشریات مرتضیٰ سولنگی نے کہا ہے کہ صحافیوں کی جبری برطرفیوں کا مسئلہ قابل قبول نہیں اور میں صحافیوں اور میڈیا ورکرز کے ساتھ کھڑا ہوں۔
منگل کو یہاں پارلیمنٹ ہاؤس میں صحافیوں سے گفتگو کرتے ہوئے وزیر اطلاعات نے بتایا کہ صحافیوں اور میڈیا ورکرز کی جبری برطرفی کے حوالے سے چیئرمین پیمرا سے بھی بات ہوئی ہے اور سینیٹ کی قائمہ کمیٹی برائے اطلاعات و نشریات کا اجلاس جمعہ کی سہ پہر ہوگا، اس مسئلہ کے بارے میں قائمہ کمیٹی کی چیئرپرسن سے بھی بات کی جائے گی۔
مرتضیٰ سولنگی نے مزید کہا کہ قانون کے تحت جو بھی اقدامات ممکن ہوئے، ہم اٹھائیں گے، حکومت کی ہمدردیاں میڈیا ورکرز کے ساتھ ہیں، میڈیا ورکرز اور صحافیوں کو جو قانونی تحفظ حاصل ہے، اس پر عمل درآمد کرانا ہماری ذمہ داری ہے۔
