اسلام آباد،22دسمبر (اے پی پی):صدر مملکت ڈاکٹر عارف علوی نے صحت کے مسائل سے متعلق مسجد و ممبر کا کردار نہایت اہم قرار دیتے ہوئے کہا ہے کہ کورونا کے دوران علمائے کرام اور پیش اماموں نے کورونا سے بچاومیں اہم کردار ادا کیا ،مساجد و ممبر غیر متعدی بیماریوں سے بچاِؤمیں اہم کردار ادا کر سکتے ہیں۔
صدر مملکت ڈاکٹر عارف علوی کی زیر صدارت جمعہ کو مساجد کے ذریعے صحت کے مسائل بارے آگاہی پیدا کرنے کے حوالے سے اجلاس منعقد ہوا۔ اجلاس میں نگران وزیرِ صحت، ڈاکٹر ندیم جان ،وفاقی وزیر برائے مذہبی امور انیق احمد ، صوبائی نمائندگان اور اعلی افسران نے شرکت کی۔ صدر مملکت ڈاکٹر عارف علوی نے کہا کہ کمیونٹی کی شرکت سے نظامِ صحت پر بیماریوں کا بوجھ کم کیا جا سکتا ہے۔
اجلاس میں صحت عامہ کی جانب مساجد کے کردار پر پالیسی ڈرافٹ تیار کرنے پر اتفاق کیا گیا ، یہ پالیسی ڈرافٹ دو ہفتے میں تیار کیا جائے گا۔وفاقی وزیر صحت نے صدرمملکت اور خاتون اول کو بیماریوں کے بارے میں آگاہی کے لئے کردار ادا کرنے کے عمل کو سراہا۔ اجلاس میں صوبائی نمائندگان نے اپنے صوبوں میں عوام کی صحت کیلئے اٹھائے گئے اقدامات کے بارے میں آگاہ کیا۔
