اسلام آباد،20 دسمبر (اے پی پی ) : وزارت انفارمیشن ٹیکنالوجی و ٹیلی کمیونیکیشن کے تحت عازمین حج کی سہولت کیلئے ریکارڈ مدت میں موبائل ایپ تیار کرلی گئی۔ نگران وزیرآئی ٹی ڈاکٹرعمر سیف اور نگران وزیر مذہبی امورانیق احمد نے نیشنل انفارمیشن ٹیکنالوجی بورڈ کی تیارکردہ ایپلی کیشن کا مشترکہ طور پر اجراءکردیا۔
تقریب سے خطاب کرتے ہوئے وفاقی وزیر انفارمیشن ٹیکنالوجی و ٹیلی کمیونی کیشن ڈاکٹر عمر سیف نے بتایا کہ ایپلی کیشن میں تمام مطلوبہ سہولیات فراہم کی گئی ہیں جس کے تحت عازمین حج خود کو رجسٹر کرواسکیں گے جس کے بعد وہ اپنے ذاتی کوائف کے اندراج اور اس میں مطلوبہ تبدیلی کے حوالے سے متعلقہ افسر سے فوری رابطہ کرسکیں گے، عازمین اپنی حج درخواست کے اسٹیٹس کو دیکھ سکیں گے کہ ان کی درخواست کس مرحلے میں ہے، اپنے حج گروپ کی معلومات، تربیتی شیڈول، فلائٹ کی معلومات، سعودی عرب میں اپنی رہائش، ادائیگی اور دوران حج مقامات کے لائیو نقشے و لوکیشن سے خود کو آگاہی رکھ سکیں گے۔
تقریب سے خطاب میں وفاقی وزیر مذہبی امور انیق احمد نے وزارت آئی ٹی اور اس کے ماتحت ادارے این آئی ٹی بی کی کاوشوں کی تعریف کرتے ہوئے کہا کہ حج آپریشنز سے متعلق موجودہ نظام کو اپ گریڈ کرنے کی ضرورت اور روزمرہ کے معاملات میں ٹیکنالوجی کو اپنایا جانا وقت کی اہم ضرورت ہے ،حج ایپلی کیشن اس جانب اہم قدم ہے جس سے نہ صرف حکام کو کسی بھی شکایت کا جواب دینے میں مدد ملے گی بلکہ عازمین حج کے حقیقی تاثرات جاننے میں مدد بھی ملے گی۔
نگران وزیرمذہبی امور کا کہنا تھا کہ اس ایپلی کیشن سے 2024 ءکا حج ڈیجیٹلائزڈ ہوگا، موبائل ایپلی کیشن سے وہ گم نہیں ہوں گے، ملائیشین خواتین کی طرح پاکستانی خواتین حجاج کو قومی پرچم والا عبایا بھی دیں گے۔
