لاہور، 10 دسمبر(اے پی پی): گورنر پنجاب محمد بلیغ الرحمٰن نے کہا ہے کہ پاکستان میں سرمایہ کاری کے لیے سازگار ماحول موجود ہے، مراکش کے سرمایہ کاروں کو پاکستان میں مختلف شعبوں میں سرمایہ کاری کے لیے خوش آمدید کہتے ہیں، پاکستان میں غیر ملکی سرمایہ کاروں کو سرمایہ کاری میں سہولیات دینے کے لیے سپیشل انویسٹمنٹ فیسیلیٹیشن کونسل کا قیام عمل میں لایا گیا ہے۔
ان خیالات کا اظہار انہوں نے مراکش میں تعینات پاکستان کے سفیر سمیع ملک سے گفتگو میں کیا، جنہوں نے اتوار کو یہاں گورنر سے ملاقات کی۔ملاقات میں باہمی دلچسپی کے امور سمیت مختلف شعبوں میں دو طرفہ تعاون کو فروغ دینے پر تبادلہ خیال کیا گیا۔
گورنر پنجاب نے نئے تعینات ہونے والے سفیر سمیع ملک کو مبارکباد دی اور نیک خواہشات کا اظہار کیا.گورنر پنجاب نے کہا کہ پاکستان اور مراکش کے مابین خوشگوار تعلقات موجود ہیں۔ امید ہے آپ ان تعلقات کو مختلف شعبوں بالخصوص تعلیم ، تجارت اور سیاحت میں نئی بلندیوں تک لے کر جائیں گے۔
گورنر پنجاب نے کہا کہ دونوں ممالک کے درمیان سٹوڈنٹس ایکسچینج پروگرام شروع کرنے سے تعلیم کے شعبے میں تعاون کو فروغ ملے گا۔ پاکستانی جامعات بین الاقوامی رینکنگ میں بہتر پوزیشن پر آ رہی ہیں۔ گورنر پنجاب نے مراکش میں تعینات پاکستانی سفیر سے ویزہ کے حصول میں مشکلات اور تاخیر کے مسلے کو حل کرنے کے حوالے سے بھی بات کی، مراکش میں تعینات پاکستانی سفیر نے اس حوالے سے ہر ممکن تعاون کی یقین دہانی کرائی۔
