اسلام آباد،22دسمبر(اے پی پی): آئندہ چوبیس گھنٹوں کے دوران ملک کے بیشتر بالائی اور وسطی علاقوں میں موسم سرد اورمطلع جزوی ابر آلود رہے گا تاہم شمال مشرقی بلوچستان، جنوبی و وسطی پنجاب اور زیریں خیبر پختونخوا میں چند مقامات پر ہلکی بارش/بوندا باندی ہو سکتی ہے جبکہ رات کے اوقات میں کشمیر، اسلام آباد، خطۂ پوٹھوہار، بالائی پنجاب اور بالائی خیبر پختونخوا میں چند مقامات پر ہلکی بارش/بوندا باندی اور پہاڑوں پرہلکی برف باری کا امکان ہے۔
ہفتہ کے روز ملک کے بیشتر علاقوں میں موسم سرد اور خشک جبکہ بالائی علاقوں میں مطلع جزوی ابر آلود رہے گا۔ تاہم صبح کے اوقات میں خطۂ پوٹھوہار، بالائی خیبرپختونخوا، کشمیراور ملحقہ پہاڑی علاقوں میں بعض مقامات پر ہلکی بارش اور پہاڑوں پرہلکی برف باری کا امکان ہے، وسطی اور جنوبی پنجاب، خیبر پختونخوا کے میدانی علاقوں اور بالائی سندھ میں صبح اور رات کے اوقات میں شدیددھند / سموگ چھائے رہے گی۔
گذشتہ چوبیس گھنٹوں کے دوران ملک کےبیشتر علاقوں میں موسم سرد اور خشک جبکہ شمالی علاقوں میں شدید سرد رہا تاہم قلات اور دالبندین میں 01ملی میٹر بارش ریکارڈ ہوئی۔
آج ریکارڈ کیے گئے کم سے کم درجہ حرارت کے مطابق لہہ میں منفی 10، اسکردومنفی 09، کالام، گلگت، گوپس منفی 05، استور اورہنزہ میں منفی 04 ڈگری سینٹی گریڈ ریکارڈ کیا گیا۔
