لاہور،19دسمبر(اے پی پی ) : نگران وزیراعلیٰ محسن نقوی کی زیر صدارت خصوصی اجلاس ہوا ،داتا دربار ہسپتال میں بہتری کے لئے مجوزہ امور پر پیش رفت کا جائزہ لیا گیا۔ اجلاس میں داتا دربار ہسپتال میں منشیات کے عادی افراد کی علاجگاہ بھی قائم کرنے کی تجویز پر غور اور داتا دربار ہسپتال کاانتظام اینٹی نارکوٹک فورس کے سپرد کرنے کاجائزہ لیا گیا۔
اجلاس میں گفتگو کرتے ہوئے نگران وزیر اعلیٰ پنجاب محسن نقوی نے کہا کہ منشیات کے عادی افراد کی علاج گاہ کے لئے داتا دربار ہسپتال میں ابتدائی طور پر 50بیڈز مختص ہوں گے داتا دربار ہسپتال عوام کے لئے بہترین طبی سہولتوں کی فراہمی ہدف ہے۔
انہوں نے کہا کہ داتا دربار ہسپتال کو انتظامی امور میں بہتری کے لئے پرائمری اینڈ سکینڈری ہیلتھ کیئر کے سپرد کیا جارہا ہے شہرکے مرکزی حصے میں واقع داتا دربار ہسپتال کی اپ گریڈیشن کی جائے گی۔
صوبائی وزیر اظفر علی ناصر،چیئرمین پلاننگ اینڈ ڈویلپمنٹ، سینئر ممبر بورڈ آ ف ریونیو، سیکرٹری اوقاف،سیکرٹری صحت،سپیشل سیکرٹری صحت کمشنر لاہور او ردیگر حکام بھی موجود تھے۔
