اسلام آباد،22 دسمبر(اے پی پی): نگران وفاقی وزیر اطلاعات و نشریات مرتضیٰ سولنگی نے جمعہ کے روز میڈیا سے گفتگو کرتے ہوئے کہا کہ میڈیا چینلز شروعات میں پیمرا کو فزیبلٹی دیتے ہیں اور پیمرا ایکٹ میں صحافیوں کو ملازمت کے حوالے سے تحفظ حاصل ہے، جس کیلئے حکومت صحافیوں کے روزگار کے تحفظ کے لئے ہر ممکن قانونی اقدامات کرے گی۔
وزیر اطلاعات نے بلوچ مظاہرین کے حوالے سے بات کرتے ہوئے کہا کہ اس معاملے میں ناخوشگوار صورتحال پیدا ہوئی،بلوچستان سے آئے ہوئے مظاہرین کے مطالبات دیرینہ ہیں، خواتین اور بچوں کو رہا کر دیا گیا ہے، زیادہ تر مرد حضرات بھی رہا ہو گئے ہیں،کمیٹی اپنا کام کر رہی ہے، اس وقت گورنر بلوچستان سے آئے ہوئے ہیں اور آج وزیراعظم سے اس کمیٹی کی میٹنگ بھی ہے۔
مرتضیٰ سولنگی نے انتخابات سے متعلق بات کرتے ہوئے کہا کہ عام انتخابات اپنے مقررہ وقت پر ہوں گے، ہمیں الیکشن کمیشن پر بھرپور اعتماد ہے، میں سیاسی جماعتوں کے اندرونی مسائل پر تبصرہ نہیں کر سکتا اور ہم نے تمام جماعتوں سے خوشگوار تعلقات رکھنے ہیں۔
