لاہور، 21دسمبر(اے پی پی): وزیر اعلیٰ پنجاب محسن نقوی کی زیر صدار ت سڑکوں کی تعمیر و مرمت کے حوالے سے خصوصی اجلاس منعقد ہوا جس میں روڈز بحالی پراجیکٹ پر رپورٹ پیش کی گئی۔اجلاس میں وزیر اعلیٰ محسن نقوی نے پنجاب کی 2600 کلومیٹر روڈز کی تعمیر ومرمت کی منظوری دی۔
اجلاس کو بتایا گیا کہ مختلف اضلاع میں 105سڑکوں کی بہترین معیار کی تعمیر ومرمت اور توسیع ہوگی، وزیراعلیٰ پنجاب نے کہا کہ سڑکوں کی تعمیر وبحالی اور توسیع کے پراجیکٹ کی تکمیل عوام کی ناگزیر ضرورت ہیں، روڈز کی تعمیرومرمت اور بحالی سے نہ صرف آمدورفت میں آسانی ہو گی بلکہ ٹریفک میں بھی روانی ہو گی۔
سیکرٹری سی اینڈ ڈبلیو سہیل انور نے سڑکوں کی تعمیر وبحالی پر ہونے والی پیشرفت پر بریفنگ دی، بریفننگ میں بتایا گیا کہ 104سڑکوں کی تعمیرو مرمت اور بحالی کے پراجیکٹ زیر التوا تھے، ایک سال سے بھی کم عرصے میں روڈز کے 104 پراجیکٹس کی عمدگی سے تکمیل ایک ریکارڈ ہوگا، صوبے کی 104 سڑکوں کی تعمیر وتوسیع اور بحالی پراجیکٹس پر تقریباً150ارب روپے لاگت آئے گی، بریفنگ میں بتایا گیا کہ روڈز کے تعمیراتی معیار کو یقینی بنانے کے لئے ہر ضلع اور ڈویڑن میں خصوصی کمیٹی مانیٹرنگ کررہی ہے،پنجاب کے مختلف اضلاع میں اہم روڈز کی تعمیر کے 9 پراجیکٹ مکمل ہوچکے ہیں، مختلف اضلاع کی 33 شاہراہیں تیز ی سے زیر تکمیل ہیں اور جلد مکمل ہوجائیں گی جبکہ مزید 39سڑکوں کے لئے اضافی فنڈز مہیا کرنے کا جائزہ لیا جارہا ہے،بریفنگ میں بتایا گیا کہ روڈز کے 6 پراجیکٹ پی ایس ڈی پی کے تحت مکمل کئے جائیں گے۔
صوبائی وزیر بلدیات عامر میر،ایڈیشنل چیف سیکرٹری، چیئرمین پلاننگ اینڈ ڈ ویلپمنٹ بورڈ، سیکرٹری خزانہ،سیکرٹری سی اینڈ ڈبلیو اور دیگر حکام بھی موجود تھے۔
