اسلام آباد،9دسمبر (اے پی پی):وفاقی وزیر برائے تجارت و صنعت گوہر اعجاز کی سربراہی میں پاکستانی وفد چین روانہ ہوگیا ہے ، وزیر تجارت گوہر اعجاز چین کے سرمایہ کاروں اور صنعتکاروں سے ملاقاتیں کریں گے ۔وفد میں محمد علی ٹبہ ، فواد احمد مختار ، عامر فیاض شیخ ، میاں احسن ، شہزاد ملک ، احسن بشیر اور عبدالرحیم ناصر شامل ہیں۔
اس موقع پر وفاقی وزیر برائے تجارت و صنعت گوہر اعجاز نے کہا کہ پاکستان کا چین کے ساتھ بڑا تجارتی حجم ہے، پاکستان چین سے سالانہ 20 ارب ڈالرز کا تجارتی مال منگواتا ہے،پاکستان صرف چین کو دو ارب ڈالرز کا مال بیچتا ہے۔ انہوں نے کہا کہ ملکی برآمدات کو بڑھانے کی سب سے زیادہ صلاحیت چین میں نظر آتی ہے، پاکستان نے تجارتی خسارہ کم کرنا ہے، ٹیکسٹائل اور نان ٹیکسٹائل ایڈوائزری کونسل نے اپنی سفارشات تیار کی ہیں۔
گوہر اعجاز نے کہا کہ فوڈ اینڈ ایگری کلچر ایکسپورٹرز کی تجاویز بھی سامنے آئی ہیں، ایڈوائزری کونسل کے 20 بڑے بڑے ایکسپورٹرز چین کا دورہ کر رہے ہیں۔انہوں نے کہا کہ پاکستان چین کے ساتھ تجارت بڑھا کر اور تجارتی خسارہ کم کرکے تمام مسائل حل کر سکتا ہے۔
