ہیگ،8دسمبر (اے پی پی):پاکستان اور نیدرلینڈز کے درمیان دوطرفہ تعلقات کے قیام کے 75 سال مکمل ہونے پر ہیگ میں یادگاری ڈاک ٹکٹ کا اجراء کیا گیا ہے۔
پاکستان کے سفیر سلجوک مستنصر تارڑ اورنیدرلینڈز کی وزارت خارجہ کے سیکرٹری جنرل پال ہیجٹس نے پاکستان اورنیدرلینڈز کے درمیان سفارتی تعلقات کے قیام کی 75 ویں سالگرہ کے موقع پر پاکستان پوسٹ کی طرف سے جاری کردہ خصوصی یادگاری ڈاک ٹکٹ کی نقاب کشائی ہالینڈ کے دفترِ خارجہ میں کی۔ اس موقع پر ڈائریکٹر ایشیا اینڈ اوشیانا ڈیپارٹمنٹ سفیر ووٹر جورجنزاورنیدرلینڈز کی وزارت خارجہ کے دیگر سینئر افسران بھی سیکرٹری جنرل پال ہیجٹس کے ہمراہ تھے۔
پاکستان کے سفیر سلجوک مستنصر تارڑ نے اس موقع پر اپنے خطاب میں دونوں ملکوں کے درمیان دو طرفہ تعاون کی بڑھتی ہوئی رفتار اور اعلیٰ سطحی رابطوں کا ذکر کرتے ہوئے کہا کہ ان میں وزیراعظم انوار الحق کاکڑ اورنیدرلینڈز کے وزیراعظم مارک روٹے کے درمیان نیویارک میں اقوام متحدہ کی جنرل اسمبلی کے سالانہ اجلاس اور دبئی میں کاپ۔ 28 کے موقع پر ہونے والی حالیہ ملاقاتیں شامل ہیں۔ انہوں نے تجارت، اقتصادیات، آئی ٹی اور پاکستان سے افرادی قوت کی درآمد کے شعبوں میں مزید تعاون کی گنجائش کو اجاگر کیا۔
سفیرِ پاکستان سلجوق مستنصر تارڑ نے اس موقع کی مناسبت سے اپنے خیالات کا اظہار کیا۔ انہوں نے دونوں ممالک کے مظبوط دوطرفہ تعلقات اور ان میں بہتری کے لئے سفارتخانہ پاکستان جانب سے کی جانے والی متعدد کوششوں سے آگاہ کیا۔
اس موقع پر اپنے خطاب میں سیکرٹری جنرل پال ہیوتس نے یادگاری ٹکٹ کے اجراءکو سراہااور اس کو دوطرفہ تعلقات میں ایک اہم سنگِ میل قراردیا۔ انہوں نے پاکستان اور نیدرلینڈز کے درمیان بڑھتے ہوئے سفارتی اور تجارتی تعلقات کی رفتار پر اطمینان کا اظہار کیا۔
اس خاص ڈاک ٹکٹ کو پاکستان کی ایک عالمی شہرت یافتہ آرٹسٹ عائشہ خالدنے ڈیزائن کیا ہے، ان کی ڈیزائن کردہ یادگاری ٹکٹ کو مختلف طبقا ت کی جانب سے سراہا گیاہے۔ سال 2023 پاکستان اورنیدرلینڈز کے سفارتی تعلقات کے 75 سال پورے ہونے کی مناسبت سے ایک اہم سنگِ میل کی حیثیت رکھتا ہے، اس سال ہیگ میں سفارتخانہ پاکستان نے متعدد تقریبات کا انعقاد کیا۔1948میں پاکستان اور نیدرلینڈز کے مابین قائم ہونے والے تعلقات مختلف شعبہ جات بشمول سیاسی، تجارت وسرمایہ کاری، سائنس اور ٹیکنالوجی، تعلیم، واٹر مینجمنٹ، موسمیاتی تبدیلی اور بین الاقوامی اداروں میں دوطرفہ تعاون کا احاطہ کرتے ہیں۔
اس سے قبل اسلام آباد میں منعقدہ تقریب میں سیکرٹری خارجہ محمد سائرس سجاد قاضی اور پاکستان میں نیدرلینڈز کی سفیر ہنی ڈی فرائز نے رواں ماہ کے اوائل میں یادگاری ڈاک ٹکٹ کا باقاعدہ اجراءکیا تھا۔
