اسلام آباد،9دسمبر (اے پی پی): نیب کے ڈائریکٹر جنرل مرزا محمد عرفان بیگ نے کہا ہے کہ نیب پاکستان کو کرپشن سے پاک کرنے کیلئے تین طرفہ سٹریٹیجی پر کام کر رہا ہے جس میں اولین حکمت عملی عوام میں کرپشن کے مضراثرات کے بارے میں بہتر آگاہی پیدا کرنا، دوم کرپشن کی روک تھام کیلئے اقدامات لینا اور تیسری حکمت عملی قوانین کو مزید بہتر کر کے ان پر بہتر عمل درآمد کرناشامل ہیں۔
ان خیالات کا اظہار انہوں نے ہفتہ کو یہاں اسلام آباد چیمبر آف کامرس اینڈ انڈسٹری میں انسداد بدعنوانی کے عالمی دن کے موقع پر منعقدہ تقریب سے خطاب میں کیا۔ نیب کے ڈائریکٹر کیپٹن ریٹائرڈ محمد فہیم قریشی اور دیگر افسران بھی اس موقع پر ان کے ہمراہ تھے۔ تاجر برادری کی ایک بڑی تعداد نے تقریب میں شرکت کی۔
مرزا محمد عرفان بیگ نے کہا کہ پاکستان میں کرپشن کی صورتحال اتنی بری نہیں جتنی دکھائی جاتی ہے، افسران کی اکثریت کرپشن سے بچنا چاہتی ہے تاہم چند افسران اس کے ذریعے فائدہ اٹھاتے ہیں ۔انہوں نے کہا کہ پاکستان میں 2005 کے زلزلے میں جہاں عوام اور اداروں کی طرف سے بے مثال قربانی کا جذبہ ظاہر کیا گیا وہاں امدادی سامان کے حوالےسے بعض نیب کیس بھی بنے، مجموعی طور پر پاکستانی معاشرہ کرپٹ نہیں ہے جو امید افزا ہے۔
نیب کے ڈائریکٹر جنرل مرزا محمد عرفان بیگ نے کہا کہ جنگ پلاسی میں ایک ہندو سیٹھ کی کرپشن کی وجہ سے شکست ہوئی اور برصغیر 200 برس تک انگریزوں کا محکوم رہا، کرپشن کو ختم کرنے کیلئے قوانین میں خامیاں دور کرنے کیلئے کوشاں ہیں، کرپشن کے خلاف شعور اجاگر کرنے کیلئے طلبا، اساتذہ، تاجر برادری اور سول سوسائٹی تک پہنچ رہے ہیں۔ گزشتہ روز ملک بھر میں نماز جمعہ کے خطبات میں انسداد بدعنوانی پر پیغامات دئیے گئے۔ نجی ہاؤسنگ سوسائٹیوں میں کرپشن کے خاتمے کیلئے کوآپریٹو ایکٹ میں اہم ترامیم کی جا رہی ہیں۔انہوں نے اس عزم کا اظہار کیا کہ تمام سٹیک ہولڈرز کے ساتھ مل کر معاشرے سے کرپشن کے خاتمے کیلئے کوشاں رہیں گے۔
اسلام آباد چیمبر آف کامرس اینڈ انڈسٹری کے صدر احسن ظفر بختاوری نے اپنے خطاب میں کہا کہ کرپشن معاشروں اور ملکوں کو ترقی کی دوڑ میں ہمیشہ پیچھے رکھتی ہے لہذا کرپشن کا خاتمہ کر کے پاکستان کو ایک ترقی یافتہ، خوشحال اور عظیم ملک بنانا ہے ۔ انہوں نے بزنس کمیونٹی پر زور دیا کہ سپیڈ منی کی ہمیشہ حوصلہ شکنی کریں ، جن معاشروں میں کرپشن ہوتی ہے وہاں سرمایہ کاری فروغ نہیں پا سکتی لہذا پاکستان کو سرمایہ کاری کیلئے ایک پرکشش ملک بنانے کیلئے کرپشن کے ناسور کو ختم کرنا ہو گا۔
نیب کے ڈائریکٹر کیپٹن ریٹائرڈ محمد فہیم قریشی نے اپنے خطاب میں کہا کہ انسداد بدعنوانی کی کوششوں پر دور سے بیٹھ کر تنقید کرنا آسان ہے،نیب نے 6 سے 8 سو ارب روپے اکٹھے کر کے قومی خزانے میں جمع کرائے ہیں اور نیب آئندہ بھی نیچے سے اوپر تک کرپشن کے خاتمے کیلئے کوششیں جاری رکھے گا جبکہ ان کوششوں کو کامیاب بنانے کیلئے نیب کو معاشرے کے بہتر تعاون کی ضرورت ہے۔
چیمبر کے نائب صدر انجینئر اظہر الاسلام ظفر نے کہا کہ معاشرہ کرپٹ افراد کا بائیکاٹ کرے تو اس میں نمایاں کمی کی جا سکتی ہے۔ انہوں نے کہا کہ معاشرے کو کرپشن کے نقصانات سے بہتر آگاہ کرنے کیلئے مزید سیمینارز اور آگاہی پروگرام منعقد کئے جائیں جبکہ چیمبر ان کوششوں میں نیب کے ساتھ بھرپور تعاون کرے گا۔
