لاہور18دسمبر:( اے پی پی ) نگران وزیراعلیٰ محسن نقوی سے گورنر سٹیٹ بینک آف پاکستان جمیل احمدنے ملاقات کی ، اس دوران معاشی صورتحال پر تبادلہ خیال کیا گیا علاوہ ازیں بینک آف پنجاب اورپنجاب کو آپریٹو بینک کے امور پربھی گفتگو کی گئی۔
اس موقع پر نگران وزیر اعلیٰ پنجاب نے کہا کہ کسانوں کو سبسڈی اورآسان قرضے دے کر زیادہ پیداوار کا ہدف حاصل کرنا چاہتے ہیں ،زیادہ پیداوار کیلئے چھوٹے کسانوں پر مالی بوجھ کم سے کم کرنا ضروری ہے ،زراعت اوردیگر شعبوں میں معاشی سرگرمیوں میں بہتری سے عوام مستفید ہوں گے۔
انہوں نے کہا کہ پنجاب میں کاٹن کی ریکارڈ پیداوار سے 2ارب ڈالرکازرمبادلہ بچے گا۔پنجاب میں چاول کی ایکسپورٹ دو ارب ڈالر سے بڑھ رہی ہے،سرمایہ کاروں اورصنعتکاروں کو تمام ممکنہ سہولتیں دینے کی پالیسی پر عمل پیرا ہیں۔محسن نقوی نے کہا کہ سٹاک ایکسچینج میں تیزی کا رجحان مثبت اثرات کا حامل ہوگا۔
