اسلام آباد،26 دسمبر(اے پی پی): پیمرا نے مختلف کھیلوں کے ایونٹس میں جوئے اور سٹے بازی کو فروغ دینے والی سروگیٹ کمپنیوں کے اشتہارات کی نشریات و تقسیم پر پابندی عائد کر دی ہے۔
پاکستان الیکٹرانک میڈیا ریگولیٹری اتھارٹی نے منگل کو ایک مراسلے کے زریعے مختلف کھیلوں کی تقریبات میں جوئے اور سٹے بازی کو فروغ دینے والی سروگیٹ کمپنیوں کے اشتہارات کی نشریات اور تقسیم پر پابندی عائد کر دی ہے۔ جاری مراسلے میں کہا گیا ہے کہ لائسنس یافتہ تمام سیٹلائٹ ٹی وی چینلز، ایف ایم ریڈیو سٹیشنز، لینڈنگ رائٹس پرمیشن ہولڈرز اور ڈسٹری بیوشن نیٹ ورک آپریٹرز پیمرا آرڈیننس 2002، ایکٹ 2023 کی شق 27 کے تحت اس حکم پر عملدرآمد کے پابند ہوں گے۔
یاد رہے کہ پیمرا کی جانب سے جاری کردہ یہ مراسلہ وزارت اطلاعات و نشریات کی جانب سے 21 دسمبر 2023 اور 6 اکتوبر 2023 کو سروگیٹ کمپنیوں کے لئے زیرو ٹالرینس کی پالیسی سے متعلق جاری کئے گئے خطوط کا تسلسل ہے۔ لہذا پیمرا نے پیمرا آرڈیننس 2002 کے سیکشن 27 (اے) کے تحت حاصل اختیارات کا استعمال کرتے ہوئے ایسی تما سروگیٹ کمپنیاں، جو ملک میں ٹیلی کاسٹ، براڈ کاسٹ یا ری براڈ کاسٹ ہونے والے مختلف کھیلوں کے مقابلوں میں سٹے بازی کو فروغ دے رہی ہیں، انکے اشتہارات کی نشریات اور تقسیم پر پابندی عائد کر دی ہے اور یہ معاملہ اتھارٹی کو مناسب سفارشات کے لئے کونسل آف کمپلینٹس کو اسلام آباد بھیجا جاتا ہے۔
مراسلے کے مطابق پیمرا کے احکامات کی عدم تعمیل یا خلاف ورزی کی صورت میں پیمرا قوانین کی متعلقہ دفعات کے تحت قانونی کارروائی شروع کی جائے گی۔
