لاہور، 31 دسمبر (اے پی پی):9 مئی کے واقعات میں ملوث عناصر کو سزا ملنی چاہیے،یہ نہیں ہو سکتا کہ جو ملک و قوم کے ساتھ دشمنی کرے اس کو کھلا چھوڑ دیا جائے، مظلوم فلسطینیوں سے یکجہتی کیلئے سال نو کی تقریبات پر پابندی لگائی گئی ہے ، خلافت راشدہ کا پہلا اصول نظام انصاف ہے ،طلاق اور خلع کی شرح میں اضافہ باعث تشویش ہے۔ان خیالات کا ظہار وزیر اعظم کے نمائندہ خصوصی وچیئر مین پاکستان علماءکونسل علامہ حافظ محمد طاہر اشرفی نے یہاں لاہور پریس کلب میں پریس کانفرنس سے خطاب کرتے ہوئے کیا ۔اس موقع پر مختلف علماءکرام بھی موجود تھے ۔
علامہ طاہر اشرفی نے کہا کہ ہماری چیف جسٹس آف پاکستان سے اپیل ہے کہ پاکستان میں نچلی سطح پر رہنے والے جو لوگ مسائل کا شکار ہیں ان کی داد رسی کے لئے کچھ نہ کچھ ضرور کر کے جائیں وہ آپ کو دعائیں دیں گے اور ملک سے غربت کا بھی خاتمہ ہو گا۔
انہوں نے کہا کہ ہمیں خلافت راشدہ کا آغاز اپنے گھر سے کرنا ہو گا اوراپنے زکوٰة کے نظام کو بہتر بنانا ہو گا،حضرت عمر فاروقؓ کے دور خلافت میں زکوٰة دینے والے تھے اور لینے والا کوئی نہیں تھا،حضرت ابوبکر صدیقؓ نے ایک رسی کے برابر بھی زکوٰة نہ دینے والوں کے خلاف جہاد کا حکم دیا،اگر پاکستان میں زکوٰةکا نظام بہترکر دیا جائے تو ملک میں غربت کی شرح میں کافی حد تک کمی ہو جائے گی ۔
انہوں نے کہا کہ پاکستان کا قیام کلمہ کی بنیاد پر ہوا ،نظریہ و نظام خلافت راشدہؓ ہے،حضرت صدیق اکبرؓ پہلے مسلمانوں کے خلیفہ ہیں جنہوں نے رسول اللہﷺ کے نظام مصطفیٰﷺ کو خلافت راشدہ سے دنیا بھر میں نافذ کیا،نظام خلافت راشدہ کا پہلا اصول نظام انصاف ہے خواہ وہ مسلمان ہو یا کافر ترازو انصاف سب کیلئے یکساں ہوگا، آج سب سے بڑا مسئلہ طلاق و خلع کا بن چکا ہے ،جو اکٹھی تین طلاقیں دے اس کے خلاف قانونی کارروائی ہونی چاہئے۔
انہوں نے کہا کہ جدید ذرائع ابلاغ کے ذریعے فحاشی و عریانی پھیلنے سے طلاقوں و خلع میں اضافہ ہو رہا ہے،جعلی خبروں سے گھر و خاندان تباہ ہو رہے ہیں۔علامہ طاہر اشرفی نے کہا کہ خلافت راشدہ میں تلواروں سے گردنیں اتارنا ہی نہیں ،سب سے پہلے انصاف، تعلیم ، صحت اورخوراک کی یکساں فراہمی شامل ہے۔
انہوں نے کہا کہ رواں سال ملک بھر میں کرسمس کے موقع پر مسیحی برادری کے لئے سکیورٹی و دیگر سہولیات کا بہتر بندو بست کیا گیا جس کا سارا کریڈٹ موجودہ نگران وفاقی و صوبائی حکومتوں کو جاتا ہے،خلافت راشدہ کا ایک پہلو یہ بھی ہے کہ غیر مسلموں کے حقوق کا تحفظ کرنا ہے، اسلام کہتا ہے کہ زیادہ سے زیادہ درخت لگاﺅ۔
علامہ طاہر اشرفی نےکہا کہ مظلوم فلسطینیوں کی حمایت میں سال نو کی تقریبات پر پابندی لگائی ہے عوام آتش بازی و دیگر تقریبات کی بجائے پیسے فلسطینیوں کو بھیجیں، ہماری فوج امدادی سامان مسلسل فلسطین بھیج رہی ہے جو ایک قابل ستائش عمل ہے۔ ہمارے سپہ سالار نے امریکی قیادت سے کہا ہے کہ فلسطین میں فوری جنگ بندی کر کے مسئلہ فلسطین حل نہ کیا گیا توغزہ کے نقصانات کے اثرات پوری دنیا پر اثر انداز ہوں گے۔
مہنگائی کے حوالے سے انہوں نے کہا کہ گرین پاکستان بننے سے زراعت میں بہتری نظر آئے گی، ایس آئی ایف سی سے گندم، چینی، چاول کی قیمتوں میں بھی کمی ہوگی۔ نگران حکومت نے اس سال حج ایک لاکھ روپے سستا کیا ہے ، ہم اسے مزید سستا کرنے کی درخواست کریں گے۔
