لاہور،22جنوری( اے پی پی ) : تربیت کے دوران عملے کی حاضری یقینی بنائی جائے، غیر حاضر عملے کیخلاف سخت کارروائی عمل میں لائی جائے۔آزادانہ، منصفانہ اور شفاف انتخابات کا انعقاد اہم قومی ذمہ داری ہے۔انہوں نے کہا کہ مطلوبہ فنڈز مہیا کر دیئے گئے ہیں، انتظامات میں کسی قسم کی کمی قابل قبول نہیں ہوگی۔ڈپٹی کمشنرز انتخابات کی تیاریوں کا روزانہ کی بنیاد پر جائزہ لیں۔ٹرانسپورٹ اور سکیورٹی پلان الیکشن انتظامات کے انتہائی اہم جزو ہیں، ان پر خصوصی توجہ دی جائے۔ ان خیالات کا اظہار چیف سیکرٹری پنجاب زاہد اختر زمان نے عام انتخابات کے سلسلے میں انتظامات کا جائزہ لینے کیلئے سول سیکرٹریٹ میں اجلاس کے دوران کیا ۔
اجلاس میں صوبائی الیکشن کمشنراعجازانور چوہان، آئی جی پنجاب ڈاکٹر عثمان انور کی اجلاس میں شرکت کی علاوہ ازیں داخلہ، بلدیات کے محکموں کے سیکرٹریز، صوبائی الیکشن کمیشن کے افسران اور متعلقہ حکام نے اجلاس میں شرکت کی اورڈویژنل کمشنرز، آرپی اوز،ڈپٹی کمشنرز اور ڈی پی اوز ویڈیو لنک کے ذریعے شریک ہوئے۔
صوبائی الیکشن کمشنر پنجاب نے اس موقع پر کہا کہ تمام ڈسٹرکٹ ریٹرننگ آفیسر پولنگ بیگ کی تیاری کے عمل کی خود نگرانی کریں۔ پولنگ سٹیشنز پر تمام بنیادی سہولیات کی فراہمی کو یقینی بنایا جائے۔ شکایات کے ازالے کیلئے کنٹرول رومز کو مزید فعال کیا جائے۔انتخابی عمل میں تمام سٹیک ہولڈرز کو بلا تفریق یکساں مواقع فراہم کئے جائیں۔صوبائی الیکسن کمشنر نے الیکشن میٹریل اور بیلٹ پیپرز کی ترسیل کے حوالے سے بھی ضروری ہدایات جاری کیں۔
سیکرٹری بلدیات احمد جاوید قاضی نے اجلاس کو بریفنگ دی اور بتایا کہ دفعہ 144 کے تحت ہوائی فائرنگ، اسلحہ کی نمائش پریکم سے 12فروری تک پابندی عائد کر دی جائے گی۔ انتہائی حساس پولنگ سٹیشنز پر سی سی ٹی وی کیمروں کی تنصیب کیلئے انتظامات مکمل ہیں۔ آرمی، رینجرز اور پولیس کے دستے5اور7فروری کو فلیگ مارچ کریں گے۔
