اسلام آباد،09 جنوری (اے پی پی): اسٹارٹ اپس کو مالی معاونت کی فراہمی اور پاکستان میں وینچر سرمایہ کاری کو تیز تر کرنے کے لیے پاکستان اسٹارٹ اپ فنڈ کا اجراء کردیا گیا ہے ۔نگراں وفاقی وزیر آئی ٹی ڈاکٹر عمر سیف نے فنڈ کا اجرا کیا جبکہ تقریب میں ملکی و غیر ملکی وینچر کیپیٹلسٹ، سفارتکاروں اور معروف ٹیکنالوجی کمپنیوں نے بھی شرکت کی۔
تقریب سے خطاب کرتے ہوئے وفاقی وزیر برائے آئی ٹی ڈاکٹر عمر سیف کا کہنا تھا کہ حکومت پاکستان نے پاکستان اسٹارٹ اپ فنڈ کے لیئے 2 بلین روپے مختص کیے ہیں۔ اسٹارٹ اپ فنڈ کے ذریعے ہر اسٹارٹ اپ کو 30 فیصد معاونت فراہم کی جائے گی جبکہ وینچر کیپیٹلسٹ 70 فیصد سرمایہ کاری کرے گا۔
وفاقی وزیر نے کہا کہ وزارت آئی ٹی اسٹارٹ اپس کو سہولیات فراہم کرنے کے لیئے کوشاں ہے، اسٹارٹ اپ فنڈ پاکستان کی معاشی ترقی میں اہم کردار ادا کرے گا۔ انہوں نے کہا پچھلے چار برس میں پاکستانی اسٹارٹ اپس میں تقریباً 800 ملین ڈالرز بیرونی سرمایہ کاری ہوئی، جبکہ ملک میں آٹھ نیشنل انکیوبیشن سینٹرز اسٹارٹ اپس کو سپورٹ کر رہے ہیں۔ان کاکہنا تھا کہ اس وقت چار ہزار سے زائد اسٹارٹ اپس کام کر رہے ہیں جن کی ترقی ہماری اولین ترجیح ہے۔
