لاہور،23 جنوری ( اے پی پی):نگران وزیر اعلیٰ محسن نقوی کی خصوصی ہدایت پر بابو صابو ٹول پلازہ ہوگا کشادہ، ٹریفک جام ہوگی نہ گاڑیوں کی لمبی قطاریں لگیں گی۔ بابو صابو چوک سے ٹول پلازہ تک راستے کو کشادہ کیاجائے گا،اضافی لین بنیں گی۔ٹول پلازہ کو موجودہ جگہ سے پیچھے شفٹ کیاجائے گا۔
وزیراعلیٰ پنجاب محسن نقوی کی ہدایت پر بابو صابوٹول پلازہ کی اپ گریڈیشن کاکام شروع کر دیا گیا ہے۔ وزیراعلیٰ محسن نقوی نے بابو صابو ٹول پلازہ کا دورہ کرکے جاری تعمیراتی کاموں کا جائزہ لیا۔ وزیراعلیٰ محسن نقوی نے بابو صابو ٹول پلازہ کے دونوں اطراف اضافی لین کی تعمیر کے کام کا معائنہ کیا اور انہوں نے بابو صابو ٹول پلازہ کی اپ گریڈیشن کا کام جلد مکمل کرنے کے لئے ہدایات دیں۔ ایف ڈبلیو او کے حکام نے بابو صابو ٹول پلازہ کی کشادگی اور اضافی لین کی تعمیر کے بارے میں بریفنگ دی۔ صوبائی وزیر ہاؤسنگ اظفر علی ناصر، سیکرٹری ہاؤسنگ، سیکرٹری تعمیرات و مواصلات، کمشنر لاہور، سی سی پی اواو رایف ڈبلیو او کے حکام بھی اس موقع پر موجود تھے۔
